Sport

Baolina kitra vehivavy Hisy fifaninanana an-tsekoly ho an`ny sokajy U-15

Sport
Zoma 15 Janoary 2021

Anisan’ny Federasiona voasafidy hanatanteraka andrana amin’ny tetikasa

volavolain’ny CAF hampiroboroboana ny baolina kitra vehivavy ny Federasiona Malagasin’ny Baolina kitra. Hisy, araka izany, « mini-championnat » mandritra ny 3 volana ireo sekoly ireo ka zazavavy 15 taona no midina no handray anjara amin’izany. Sekoly miisa 8 aloha no hiara-hiasa amin’ny federasiona amin’ny fanatanterahana izany, amin’ny alalan’ny Concours scolaire CAF U15-Football Féminin. Anisan’izany ny Collège de France, Collège Rasalama, ESCA Antanimena, CEG Nanisana, CEG Antanimbarinandriana, CEG 67 Ha, , CEG Analamahitsy ary ny Collège St Michel Amparibe. Mialoha an’izay anefa dia hisy ny fampiofanana (Licence D) ho an’ireo mpampianatra fanatanjahantena sy tompon’andraikitra eo anivon’ireo sekoly tsirairay avy. Marihina fa hezahina aparitaka manerana ny Nosy ity tetikasa ity amin’ny andiany manaraka mba ahafahan’ireo faritra rehetra misitraka izany. Nisy ny fihaonana voalohany tamin’ireo talen-tsekoly sy ireo tompon’andraikitra ara-panatanjahantena tao Isoraka, mba ho fanomanana sahady ny hetsika izay hotontosaina.

Marigny A.