Sport

Baolina kitra - FMF Nahemotra indray ny fifidianana

Sport
Alarobia 03 Oktobra 2018

Tsy maintsy hahemotra fa tsy hotontosaina amin’ny 27 oktobra ho avy izao araka ny voalaza tany aloha ny fifidianana an’ireo mpitantana vaovao ny baolina kitra Malagasy (ny filohany sy ny mpanatanteraka), hoy ny filohan’ny CNE Baolina kitra, Raherimanana Lala, notronin’ny filoha lefiny, Rakotovao Njaka, nitafa fohy tamin’ny mpanao gazety teny Isoraka omaly talata 2 oktobra 2018.

Ny antony, hoy izy ireo, dia noho ny olana misy eo amin’ireo ligy 3 tsy nahavita fifidianana mpitantana azy (V7V, Matsiatra Ambony ary Bongolava). Tsy nankatoavin’ny CNE baolina kitra ny fifidianana filohan’ny ligin’i V7V sy Matsiatra Ambony natao tamin’ny 6 sy 7 septambra teo fa tsy nahatratra fetr’isa ny mpifidy tonga. Ary haverina noho ny toromariky ny Fifa kosa ny fifidianana filohan’ny ligin’i Bongolava. Izany no natao dia mba hanomezan-danja an’ireo ligy ireo. Ezahina hotontosaina amin’ny herinandro ho avy io ny mikasika an’ireo fifidianana rezionaly ireo. Ezahana hotanterahina ao anatin’ny fotoana faran’izay haingana kosa ny fifidianana mpitantana foiben’ny FMF ka hamoaka datin’androm-pifidianana vaovao indray izahay. Tsy miova fa 1 volana alohan’ny datim-pifidianana no fara fisoratana anarana ho an’izay te-hirotsaka ho filohan’ny FMF ary 21 andro mialoha ny datim-pifidianana ho an’ny hirotsaka ho mpikambana ho komitim-pitantanana ny FMF.

Ntsoavina Evariste