Sport

Partagé sur :
• facebook

Manomboka mafampana ny tontolon’ny baolina kitra amin’izao fotoana, noho ny resaka fifidianana.

Misy ireo velon’ahiahy ny amin’ny zava-mitranga satria tsikaritra ny tsy fanajana ny fitsipika sy ny lalàna amin’ny tranga sasany. Misy fifidianana teny anivon’ny seksiona no nofoanan’ny vaomiera nasionaly misahana ny fifidianana (CEN) na dia efa nisy aza ny kandida lany. Tranga izay somary nahagaga ihany satria efa misy ny vaomiera isam-paritra, kanefa tonga dia niditra an-tsehatra ny vaomiera nasionaly. Ny tsy fahalanian’ny kandida sasany angamba no nampiova tahaka izao ny fomba fiasa, hoy ny filohana ligy iray. Tafiditra ao anatin’ireo fifidianana nofoanana ary voalaza fa haverina ny any Tsiroanomandidy (Bongolava), kanefa Atoa Gaetan dia lany mazava tamin’ny isam-bato 16 no ho 4. Haverina koa ny  any  Beroroha sy Ankazoabo (Atsimo-Andrefana) ary ny any Antanifotsy (Vakinankaratra), araka ny fanapahan-kevitry ny CEN hatrany. Etsy an-kilan’izay anefa ny zavatra tena mahatalanjona dia efa manana filohan’ny seksionina ny ao Ikalamavony dia i Zafimahaleo Razanajatovo sy ny ao Nosy Varika dia i Germain Randrianasolo na dia tsy nisy fifidianana mazava aza, hoy ny loharanom-baovao iray. Tsy nisy mihitsy ny peta-drindrina milaza ny hanatanterahana ny fifidianana tany amin’ireo toerana roa ireo. Mbola misy ihany koa ny zavatra hafahafa nitranga tany Vohibato, Sakaraha ary Ambohimahasoa. Hisy ny fivoriana tsy ara-potoana eto Antananarivo iarahan’ireo filohan’ny ligy 16 hotanterahana ny alatsinainy 4 desambra ho avy izao mba handinihana izany tranga rehetra izany sy hanapahan-kevitra ny amin’ny tokony hatao, indrindra momba ny tena andraikitry ny Commission Electorale Nationale (CEN). Ity vaomiera ity izay re, araka ny feo mandeha, fa toa hoe mitady ny fomba rehetra hanilihana ny kandida filohana ligy isany Giscard Andriano (Vatovavy Fitovinany), Mamany Gan (Matsiatra Ambony) ary Brino (Amoron’i Mania).

Tia Tanindrazana

Samia mijoro ho an'i Gasikara.