Sport

Baolina kitra "Coupe d'Afrique" Tafita amin'ny dingana manaraka ny Fosa Juniors

Sport
Alakamisy 22 Febroary 2018

Tafita amin'ny dingana manaraka amin'ny fiadiana ny amboaran'i Afrika eo amin'ny lalao baolina kitra ny ekipa solontena Malagasy Fosa Juniors Boeny rehefa nirava ady sahala 0-0 tamin'ny Léopard Kenianina tao amin'ny kianja Rabemananjara Mahajanga omaly alarobia 21 febroary 2018 teo amin'ny lalao miverin'ny fifaninanana savaranonando amin'ity fifaninanana ity.

Ampy nahatafita ny ekipa Malagasy izay hikatroka amin'ny Aspl 2000 Maorisianina amin'ny lalao 1/32-ndalana io 0-0 io satria ady sahala 1-1 ny lalao mandroso notanterahina tany Kenya herinandro lasa izay. Nidorehitra loko vonimboasary ny kianjan-dRabemananjara Mahajanga omaly alarobia satria nisy ny fizarana Tee-shirts Fosa Juniors maimaimpoana niisa 1000 tany ho any teo am-pidirana ny kianja. Feno hipoka tanteraka (à guichet fermé) ihany koa ity kianja ity na dia andro andavanandro aza no nanatanterahana ny fihaonana satria nisy ny fanambarana navoakan'ny prefen'i Mahajanga fa natao andro tsy fiasana nefa handraisan-karama omaly alarobia hariva 21 febroary tany Mahajanga.

Ntsoavina Evariste (Iraka manokana tany Mahajanga)