Baolina kitra - Barea

Partagé sur :
• facebook

Maneho fahavononana hanatsarana ny Barea ny filoha vaovao ny federasiona, Alfred Randriamanampisoa.

Tsy misy maharatsy izany ary maha te hidera aza ny ezaka saingy tokony mifampiresaka amin'ireo teknisiana ihany izy. Heno mantsy izao fa handeha handresy lahatra an'i Francis Coquelin (Villaréal) sy Rémy Vita (Sittard) izy. Raha i Francis Coquelin aloha dia tena ho tombony ao afovoan'ny kianja ny fiarahany amin'i Rayan Raveloson sy Marco Ilaimaritra. Fa raha Rémy Vita kosa indray dia efa manana an'i Kendji Van Boto sy Safidy Titouan ary Dadafara isika eo amin'ny vodilaharana ankavia io izay toerana misy an'i Vita. Ity farany moa dia tao amin'ny Troyes niaraka tamin'i Rayan Raveloson no nahitan'ny Bayern azy saingy mety tsy nahafampo dia naleony nampidramina aloha nefa nony farany dia navelany ihany. Ka raha hanova ihany tsy aleo ve mpilalao efa tena marin-toerana toa an'i Kendji Van Boto no hajoro. Raha ny filana izao ka hieritreritra hanao Mondial izany dia tokony Ludovic Ajorque milalao any Alemaina no hatao izay hanekeny. Tokony mijery mpiandry tsatokazo milalao any amin'ny klioba lehibe no kendrena satria i Melvin Adrien anie ka Thonon Gaillard no hilalaovany. Izany hoe diviziona fahaefatra any Frantsa. Raha tena mahay ve izy tsy mba efa lasa Ligy 2 farafaharatsiny. Asa aloha fa aleo mitandrona raha mieritreritra handeha lavitra. Ary eo amin'izay resaka izay dia tokony mba hametraka ny fotoana hilalaovan'ny moilalao tsirairay fa tsy toy ny taloha intsony hoe tsy manana klioba aza dia mbola nantsoin'i Nicolas Dupuis na koa mpilalao any amin'ny firenena tsy hita tabilao toa Romania na Luxembourg. Izay ilay tena avo lenta raha tsy te handiso fanantenanana ny Malagasy izay efa hampijalian'ny fidangan'ny vidim-piainana.
Clément RABARY
 

Tia Tanindrazana

Samia mijoro ho an'i Gasikara.