Sport

Partagé sur :
• facebook

Hanatontosa an’ireo lalao tsy vita tamin’ny andro voalohany sy faharoan’ny fiadiana ny ho tompondakan’ny Ligue 1 ao aminy anio alakamisy 10 janoary sy amin’ny alahady 13 janoary 2019 ny ligin’ny baolina kitra eto Analamanga.

Anio alakamisy dia hiditra an-tsehatra amin’izay eny amin’ny kianjan’i Carion ny ekipan’ny Elgeco Plus tompondaka farany rehefa avy niatrika ny fifaninanana Afrikanina   ka hikatroka amin’ny ekipa tanora dia tanoran’ny Five Fc avy eny amin’ny Boriborintany faha-5 eto Iarivo tarihan’ny mpanazatra Navalona izay tanora dia tanora ihany koa. Sambany koa ity ekipan’ny Five Fc ity vao hilalao eo anivon’ity Ligue 1 Analamanga ity fa tany amin’ny D-2 izy ireo tamin’ny taon-dasa izao niakatra dingana avo  lenta izao. Tsy hikely soroka izahay hifampitana amin’ny Elgeco tompondaka farany, hoy i Navalona na dia efa voky traikefa aza izy ireo satria ny baolina kitra tsy « calcul » na « mathématique ». Lalao 3 kosa no harahina etsy amin’ny kianjan’i Mahamasina amin’ny alahady 13  janoary : 10:00-Cosfa # Cf Tfc ;  12:00-Cospn # Tana Formation-Cffa ; 14:00-Uscafoot # Elgeco Plus.

Miroso amin’ny  fampilalaovana mpilalao tanora kosa ny Elgeco Plus, araka ny nambaran’i Bob « Robson Hubert » mpanazatrany,  ka nampiakatra mpilalao 5 avy any amin’ny D-2 ao aminy hanampy an’ireo efa ao amin’ny Ligue 1. Mbola hoeritreretina aza ny haka mpilalao tanora vitsivitsy avy any amin’ny Faritra hanatevin-daharana ny ekipa D-1 anay io any amin’ny fiatrehana ny fifaninanana nasionaly any.

Ntsoavina Evariste

Tia Tanindrazana

Samia mijoro ho an'i Gasikara.