Sport

Partagé sur :
• facebook

Azo ambara fa fahombiazana roa sosona no azon’ireo ekipa Malagasy mandray anjara amin’ny fifaninanana Afrikana ankehitriny.

Nandresy ny Kcca Ougadey 2-1 teo amin’ny kianjany teny Vontovorona tamin’ny sabotsy 10 febroary teo, ny ekipan’ny CNaPS Sport solontenantsika amin’ny fifaninanana “Champion’s League Africain 2018” dingana savaranonando lalao mandroso. Tena niezaka mafy ry Ando sy ny namany ka nahatifiditra ireo baolina roa antom-pandresena (Feno 58’ ary Francis 90’+2) ireo na dia ry zareo Ougandey aza no nitarika an’isa teo amin’ny minitra faha-53 tamin’ny alalan’ny baolina matin’i Derrick. Ady sahala 0-0 dia ampy hahatafita ny CNaPS Sport amin’ny dingana manaraka amin’ny lalao miverina hatao any Kampala Ouganda ny alarobia 21 febroary 2018 izao. Nilaza ny hanome toromarika ny hamonoana baolina an-tanin’olona an’ireo mpilalao anefa ny mpanazatra ny CNaPS Sport, Andriambololona Tipeh.

Nisaraka ady sahala 1-1 tamin’ny Afc Léopard Kenya kosa omaly alahady 11 febroary tao amin’ny kianjan’i Bukhungu Stadium any Kenya. Na dia efa nitarika an’isa 1-0 koa aza ry zareo mpampiantrano dia nosahalain-dRado kely teo amin’ny minitra faha-15. Mbola nisy baolina faha-2 matin-dRado kely koa aza teo amin’ny minitra faha-36 saingy nolavin’ny mpitsara fa hoe “hors-jeux” izany. 0 sy 0 ihany koa amin’ny lalao miverina hotanterahina any Mahajanga amin’ny alarobia 21 febroary dia ampy hahatafita ny Fosa Juniors amin’ny dingana manaraka. Ny mamono baolina anefa no tena azo antoka indrindra.  

Ntsoavina Evariste

Tia Tanindrazana

Samia mijoro ho an'i Gasikara.