Sport

Atletisma Malagasy Nahazo fankatoavana tamin’ny AGO

Sport
Alatsinainy 03 Jona 2019

Tontosa teny amin’ny INFRA Alarobia tamin’ny sabotsy 01 jona 2019 teo ny AGO “Fivoriambe ara-potoana” 2019 an’ny FMA

“Federasiona Malagasin’ny taranja Atletisma” notarihan’ny filohany Rtoa Norolalao Andriamahazo. Taorian’ny fihainoana ny tatitra nataon’ny FMA dia niroso tsirairay tamin’ny fanaovany tatitra ny zava-misy tany aminy koa ireo ligim-paritry ny Atletisma 11 amin’ny 12 misy afa-tsy ny ligin’i Boeny izay tsy tonga. Nanome fankatoavana ny FMA ny ankamaroan’ireo ligy 11 ireo ary nankato ihany koa ny volavolana fanitsiana ny statut an’ity Federasiona ity, indrindra ny “Code d’éthique”, araka ny tolo-kevitry ny IAAF “Federasion’ny Atletisme Maneran-tany”. Nomarihan-dRtoa Norolalao Andriamahazo ihany koa taorian’io AG io fa : “nitombo ny fianakaviambe ny atletisma Malagasy fa tafatsangana ny ligy roa vaovao dia V7V izay misy seksiona 2, Vohipeno sy Manakara tarihin’ny filohany Tata Ahmed Jacquis sy Anôsy misy an’Amboasary sy Taolagnaro tarihan’i Bravo Jean Bosco. Lasa 14 izany ankehitriny ireo ligin’ny taranja Atletisma Malagasy : Matsiatra Ambony, Atsimo andrefana, Analamanga, Itasy, Vakinankaratra, Alaotra mangoro, Amoron i Mania, Ihorombe, Bongolava, DIANA, Boeny, Atsinanana, V7V ary Anosy.

Ntsoavina Evariste