Sport

Atletisma “Kid’s Mile Run” sy Tompondakan’i Madagasikara 2019 Nifanindran-dalana tetsy amin’ny kianjan’Alarobia omaly

Sport
Alakamisy 06 Jona 2019

Anio alakamisy 06 jona tolakandro vao tena hanomboka ny fifaninanam-pirenena fiadiana ny ho tompondakan’i Madagasikara 2019 taranja atletisma sokajy tanora fa omaly alarobia 05 jona aloha dia ny dinika teknika

nifanaovan’ny solontenan’ireo klioba handray anjara sy ny tompon’andraikitra teknika eo anivon’ny FMA no notanterahina teny amin’ny foibeny teny Alarobia. Fa teo amin’ny kianjan’Alarobia kosa dia nifanindran-dalana tamin’io dinika teknikan’ny fiadiana ny ho tompondakan’ny tanora io omaly ny hetsika “Kid’s Mile Run” nokarakarain’ny FMA tarihan’ny filohany Rtoa Norolalao Andriamahazo ihany avy amin’ny toromarika nomen’ny Federasion’ny Atletisma iraisam-pirenena ny IAAF “International Association of Athletics Federations” tarihan’ny filohany Sébastian Coe niangavy an’ireo federasiona mpikambana ao aminy mba hankalaza andro eran-tanin’ny fihazakazahana an-tongotra izay marihana mandritra ny herinandro nanomboka tamin’ny 02 jona teo ka hikarakara hazakazaka “1 Mile” antsoina hoe : “Kid’s Mile Run” ho an’ny ankizy miaraka amin’ny minisiteran’ny Fanabeazana sy ny Fanatanjahantena omaly alarobia 05 jona. Ankizy mpianatra lahy sy vavy nanodidina ny 80 isa avy amin’ny sekoly 3 (La pepite Colombe, Epn ary Glory) sy ivontoeram-panofanana tanora 2 (Ecoles des Athlètes Alarobia sy Ecole de foot Jet Mada) no nandray anjara tamin’izany.

Ntsoavina Evariste