Sport

Atletisma Hampiantrano ny hetsika fankalazana ny andro manerantany i Toliara

Sport
Alakamisy 07 Mey 2015

I Toliara no hampiantrano ireo hetsika fankalazana ny andro manerantanin�ny atletisma taorian�ny tany Antsirabe sy Tsiroanomandidy. Hiaraka hikarakara ny hetsika ny federasiona malagasy sy ny ligin�Atsimo

Andrefana mpampiantrano. Hisy toy ny mahazatra ny fifaninanana ho an’ireo katitakely antsoina hoe “Kids Athletics” ahitana ny sokajy U12, ny U15 izay natokana ho an’ireo mpianatra avy amina sekoly ary ny U17 avy amina klioba. Maro ireo taranja voalahatra hifaninanana dia ny hazakazaka 50m, 1 000m, 3 000m, ny dia maika, ny vikindava, ny tsipy fonjamby ary hazakazaka mifampitohy 4x50m. Hiaraka hamboly hazo ao amin’ny EPP Tsimenatse avokoa aloha ireo mpanatrika ny hetsika mialoha ireo fifaninanana ireo. Mbola hisy koa ny hazakazaka ho an’ireo vehivavy hampisalorana ny anarana hoe “Lain’ampela” amin’ny halavirana mirefy 2km, mianga manoloana ny biraon’ny Genie Rurale hatreny amin’ny kianjan’Andaboly mialoha ny hiakaran’ireo kilonga an-tsehatra.

Rasanda Serge