Sport

ASSM Hand-Ball 55 taona Nentina am-bavaka tetsy Amparibe

Sport
Alakamisy 30 Aogositra 2018

Natomboka tamin’ny “tournoi” iraisam-pirenena notontosaina tetsy amin’ny kianja mitafon’Ankorondrano ny 31 jolay-05 aogositra 2018 teo ny fanamarihana ny fankalazana ny faha-55 taonan’ny ekipan’ny ASSM Hand-Ball.

Lamesa fanomezam-boninahitra sy fisaorana an’Andriamanitra kosa no natao noho ny fitahiana an’izay lalana nodiavina izay sy mbola hitahiana koa ny andro manaraka rehetra, tetsy amin’ny Sekoly Md Misely Amparibe tamin’ny alahady 26 aogositra 2018 teo. Tokony ho tamin’ny taon-dasa 2017 no nanamarihana azy ity fa nahemotra amin’ity taona 2018 ity noho ny zava-nitranga teto amin’ny firenena tamin’io. Nambaran’i Berthin Andriamiarinosy akanga sisa nanamborana tamin’ireo niara-nanorina an’ity ASSM Hand-Ball ity niaraka tamin-dry Frère Fazio, Père Ginan ary Alexandre Bertone tamin’ny taona 1962, fa mbola hisy lanonana fiaraha-misakafo hatao ho famaranana ny fankalazana. Marihina fa efa nahazo anaram-boninahitra in-23 ny senior ASSM, in-4 ny sokajy vehivavy ary in-10 ny tanora Hand-Ball Assm ka anisan’ny nitondra anjara biriky betsaka tamin’izany i Mohamed Saleh nodimandry tamin’ity taona ity.

Ntsoavina Evariste