Sport

Andy Pelmard Mety ho lasa Barea ihany koa

Sport
Alarobia 10 Jona 2020

Paozipaozin’ny hisihisy ihany ny fiovana eo anivon’ny ekipam-pirenena malagasin’ny baolina kitra na Barean’i Madagasikara aorian’izao ahamehana ara-pahasalamana izao.

Tsy miato ny fitrandrahan’ny mpanazatra, Nicolas Dupuis, mpilalao vaovao na dia eo aza ny ady amin’ity aretina COVID 19 ity. Fantatra ho efa mahaliana azy ihany koa ankehitriny ary nanirahany irony iraka mpanadihady na « agent » irony ilay vodilaharana milalao ao amin’ny OGC Nice, divizionina voalohany frantsay. Mandeha ny fandresen-dahatra rehetra mba handrisika ity tovolahy 1,79 m, 20 taona ity mba hanaiky handrafitra ny Barea. Manana zom-pirenena frantsay izy, raha ny ofisialy amin’ny maha mpikitra hatreto saingy malagasy ny reniny raha toa ka Cap verdianina kosa ny rainy. Tsy mbola voaantso handrafitra amina ekipam-pirenena mihitsy izy raha ny fantatra hatreto aloha ka malalaka ho azy noho izany ny safidy.

J. Mirija