Sport

Andriamahitsinoro Carolus Mpampidi-baolina be indrindra any Arabie Saoudite D-2

Sport
Zoma 17 Mey 2019

Tapitra tamin’ny alarobia 15 mey 2019 alina teo ny fifaninanana baolina kitra sokajy diviziona faharoa any Arabie Saoudite na ny « Prince Mohammed League » izay hilalaovan’ilay lohalaharana Malagasy " Carolus ".

Nihaona tamin’i Damak Football Club ny Al-adalah Fc ekipa hilalaovany tamin’io ka nibata fandresena 2-0, nitondra an-dry zareo eo amin’ny laharana faha-3 ao amin’ity sokajy ity. Tafiakatra any amin’ny sokajy Diviziona voalohany ny klioba ilalaovany amin’ny taona ho avy 2020. Voahosotra ho mpilalao mpampidi-baolina be indrindra tamin’io fifaninanana io any Arabie Saoudite i Carolus. Nahatratra 22 ny baolina matiny ary 7 kosa ny « Passes décisives » nalefany tamin’ny namany. Inoana fa hitondra hery lehibe ho an’ny Barea Malagasy hiatrika ny CAN 2019 any Egypta ny tenany.

Ntsoavina Evariste