Sport

Ampahefa-dalan’ny CAN 2019 Handrakotra ny renivohitra anio alina ny polisy 1350

Sport
Alakamisy 11 Jolay 2019

Ho fitandroana ny filaminana sy ny fandriampahalemana, hidina an-dalambe ny polisim-pirenena anio alina.

Araka ny fampitam-baovaon’ny polisim-pirenena manoloana ny mpanao gazety omaly atoandro teo Anosy, manoloana ny fiatrehan’ny Ekipam-pirenena Malagasy BAREA ny taranja baolina kitra ny ampahefa-dalan’ny CAN 2019 dia nisy ny fepetra manokana norasin’ny minisiteran’ny Filaminam-bahoaka mahakasika ny fitandroana ny filaminanana anio alakamisy 10 jolay 2019. Araka izany dia polisy miisa 1350 no hiandraikitra ny filaminana eto an-drenivohitra ka toy ny tamin’ny fotoanan’ny ampahavalon-dalana dia mbola hisy hatrany ny polisy hijoro eny amin’ireny toerana be olona ireny. Hisy ny polisy manokana hisahana ny fifamoivoizana mandritra ny alina tontolo mba hisorohana ny fitohanana. Nanao antso avo ny polisim-pirenena mba tena hiara-kientana ao anaty hafaliana sy amin’ny fifanajana ny Malagasy iray manontolo eo am-panohanana ny ekipam-pirenena Malagasy. Midika izany fa hirindra ny fifamoivoizana. Manantena ihany koa ny any amin’ny renivohi-paritra ny ho toy izany.

Haja Nirina