Sport

Amboaran`ny CAF Nandresy fa tsy tafita ny Fosa Juniors

Sport
Alakamisy 19 Aprily 2018

Na dia nandavo ny Aduana Stars avy any Ghana tamin`ny isa 2 noho 1 aza ny Fosa Juniors tany amin’ny Kianja Rabemananjara Mahajanga omaly, nandritra ny fihaonana miverina teo amin`ny lalao 1/16n-dalana,

hiadiana ny ``Amboaran`ny CAF`` dia tapitra hatreo ny dian`izy ireo. Fanafihana totoafo no nataon`ny ekipan`i Bob ary nanao izay ho afany mihitsy, hany ka teo amin’ny minitra faha-4 dia efa naampidi-baolina iray tamin’ny alalan’ny penality. Mbola nahafaty baolina iray faharoa ny Malagasy, saingy nampihena ny herijikantsika ny nahatafidiran’ny mpifanandrina baolina iray. Marihana fa efa niondrika tamin’ny isa 6-1 isika nandritra ny fihaonana mandroso ka nila nandresy 5 no ho 0 ny Fosa Juniors raha te hanohy ny diany, kanefa tsy ampy niakarana tany amin’ny dingana manaraka ny fandresena omaly. Na izany na tsy izany, dia mendrika ny Fosa Juniors, ary nahavita dingana lehibe sahady teo amin’ny sehatry ny baolina kitra, raha tarafina amin’ny fotoana nijoroany.

Ntsoavina Evariste