Sport

Ahmad – filohan’ny CAF Nahazo “Docteur Honoris Causa” tany Ghana

Sport
Alakamisy 26 Aprily 2018

Nosaloran’ny University Professional Studies Accra (UPSA) any Ghana ny mariboninahitra ambony Docteur Honoris Causa ny filohan’ny CAF, ilay teratany Malagasy Ahmad.

Nanatrika ny lanonana manetriketrika nanolorana izany ny filohan’ny repoblikan’i Ghana, Atoa Nana Addo Dankwa Akufo-Addo. Marihina fa efa voahosotry ny Groupe Allafrica Global Media izay manana ny foibeny any Washington – Etazonia ho « personnalité sportive de l’année 2017 » mialoha izao Atoa Ahmad. Anisan’ireo vahiny manan-kaja voaasa manokana nihaona tamin’ny filoha Frantsay Emmanuel Macron sy ny filoha Liberianina sady efa « ballon d’or » Afrikanina George Weah ihany koa izy tao amin’ny lapam-panjakana Elysée tamin’io taona io ihany. Midika izany fa manomboka manana ny toerany eo amin’ny sehatry ny fifandraisana iraisam-pirenena ny filohan’ny CAF ary atokisan’ny olona. Ny mampalahelo anefa, hoy ireo olona akaiky azy dia eto Madagasikara indray Atoa Ahmad no toa voailikilika satria fantatra fa tsy manana ny antsoina hoe : « Passeport diplomatique » intsony amin’ny maha teratany Malagasy manampahefana azy sy avy efa nitana andraikitra ambony (filohan’ny FMF, Loholona) teto Madagasikara ny tenany. Ary raha nanainga teto Madagasikara ny 8 aprily 2017 hamonjy ny toeram-piasany any Ejipta aza izy dia tsy nomena salon d’honneur teny Ivato.

RTT