Sosialy

Partagé sur :
• facebook

Voasokajy ho faritra tandindonin-doza ny faritra rehetra eny Ampamarinana noho ny fisian'ny triatra miisa 24 amin'ireo haram-bato eny an-toerana. Efa niaraha-nahita ireo loza nisesisesy

 nitranga koa nanapa-kevitra omaly tao anatin’ny filankevitry ny minisitra manokana ny fitondram-panjakana fa miala eny daholo ny mponina rehetra eny ary hafindra monina vonjimaika eny amin’ny Village Voara (route digue) sy Iharinarivo (Ambohidratrimo). Mahazo laharampahamehana ireo traboina tena sahirana noho ny loza nitranga ny 19 janoary sy omaly 3 febroary. Ny sefo fokontany, ny BNGRC, ny minisiteran'ny asa vaventy sy ny toeram-ponenana no hiantoka ny famindrana ny olona tena traboina ary raisin'ny fanjakana an-tanana ny fandaniana.

Noho ny doboka tafondro ?

Tsy manapoaka zavatra na vato fahavaratra ny Ntaolo. Efatra ny maty, 11 no naratra mafy nihotsahan’ny bolongam-bato izay nizara dimy ka nandravarava tokantrano 5, omaly alahady atoandro sahabo tamin’ny 10 ora sy 20 mn, teo amin’ny fokontany Ambanin’Ampamarinana, Mahamasina; araka ny fampitam-baovaon’ny Lieutenant Colonel Francky Ramanoara, lehiben’ny sampana mpamonjy voina Antananarivo Renivohitra, omaly tolakandro. Tsy nihambahamba kosa ireo niharam-boina sy ireo mpiara-monina amin’izy ireo nihevitra fa anisan’ny nahatonga ny fihotsahan’ny vato nanao sesilany namoa-doza ny fidoboky ny tafondro. “Ny harivan’ny doboka tafondro farany teo no nianjera ny  vato teo Tsimialonjafy, tapa-bolana aty aoriana indray ny teo aminay fokontany Ambanin’Ampamarinana. Nihozongozona avokoa iny Faritra avo rehetra iny, tamin’ny tafondro nipoaka. Mety misy harambato na fandrin-tany ifandraisany amin’Andrefan’Ambohijanahary ny Faritra avo. Tamin’ity fanapoahana tafondro farany ity dia tsy nampihomanina izahay fa isaky ny 26 jona fetim-pirenena dia asaina mamoha trano daholo izahay ary heverina fa misy akony amin’ny trano sy ny tany ary ny zavatra rehetra eny ambony eny izany amin’ny lafiny fizika sy siantifika. Sady ny fetim-pirenena rahateo amin’ny main-tany. Nefa amin’ny maha Malagasy, tsy hita hovisavisaina izany rehetra izany fa efa izao no anjara sy lahatra dia zakaina.”, hoy i Fanja sy Saholy ary ny fianakavian’ireo niharam-boina, nanana ny maty sy naratra raha nifandrombaka nitantara tamin’ny mpanao gazetinay, omaly tolakandro teo ampitan’ny HJRA.

Tarazon’ny an-jato taona

Etsy an-daniny anefa, efa an-jatony taona no nisy fanorenam-ponenana tamin’ny faritra avo eto an-drenivohitra ka azo lazaina fa efa antitra ny toerana ary nokaohan’ny riaka koa ny ranontany. Mety ho fifanandrifian-javatra ihany koa, nisy fotoana tsy nisy tafondro nirefotra nefa nisy vato sy tany nihotsaka tamin’ny toeran-kafa. Efa hatramin’ny Fanjanahantany ihany koa no naharenesana tafondro fa tsy nisy loza toy izao. Nihevitra ireo nianjeran’ny vato fa miray hina tanteraka tamin’ny namany iny vatobe iny, nilaza mantsy izy ireo fa efa hatramin’ny dadabeny no teo ary tsy nisy ahiahy. Araka ny fahitan’ireo mpiara-mipetraka avy aty ambony somary mitazana misopirana eny Ambanin’Ampamarinana kosa anefa dia tsikaritr’izy ireo fa misy rano mitsika hatrany avy any ambanin’ilay vato. Hitan’izy ireo ny tsy firaiketan’ilay vato nandondona tamin’ny namany noho ny fahatazanany tany manelanelana azy ireo. Marihina fa horaisin’ny fitondram-panjakana an-tanana avokoa na ny fandevenana ny maty na fitsaboana ireo maratra, araka ny fanambaran’ireo solontenan’ny fitondrana tonga nitsapa alahelo sy nitsidika ireo marary teny amin’ny HJRA Ampefiloha, omaly. Araka ny filazan’ny havan’ny maty dia mpianakavy avokoa ireo tra-doza, mifankafantatra, tsy nisy tavela tototry ny tany izy ireo. Efa nampilaza vaovao ny BNGRC tamin’ny herinandro lasa fa misy vato ahiana eo Manjakamiadana.

Haja Nirina sy J Mirija

Tia Tanindrazana

Samia mijoro ho an'i Gasikara.