Politique

Partagé sur :
• facebook

Dingana iray hirosoana amin’ny fivoahana amin’ny krizy no vita, hoy ny Groupement des Forces Centristes, na Vondron’ny elanelam-panahy, raha nitondra fanazavan-kevitra taorian’ny fahavitan’ny sonia ny sori-dalana tao amin’ny Le Paon d’Or Antanetibe Ivato ny alin’ny zoma 16 septambra teo.

 Vondrona efatra, dia ny GREMA izay tarihin’i Saraha Georget Rabeharisoa, ny NACD (Nouvelle Alliance pour le Changement Démocratique) nosoloin’ny Pr Tehindrazanarivelo Alain tena, ny PSRI (Plateforme pour la Stabilité et la Reconnaissance Internationale) tarihin’i Gilbert Raharizatovo ary ny FMM (Force Médiane Mixte) tarihin’i Max Fabien Andrianirina. Nambaran’izy ireo fa sarotra ny ezaka nampifanatonana ireo vondrona roa mifanipaka hevitra, dia ny milaza fa miverina tsy misy fepetra Atoa Ravalomanana sy ireo izay mivoy fa tsy miverina eto Ravalomanana, vao tonga tamin’iny sonia iny.

Nambaran’izy ireo fa nandroso tolokevitra tamin’ny iraky ny Troika izy ireo ary noraisina izany, ka nahatongavana tamin’iny sonia iny. Dingana ihany anefa iny, hoy ity Vondron’ny elanelam-panahy ity, ka miantso ny SADC izy ireo handray ny hataka nataon’ny Ankolafy Ratsiraka, hisian’ny fihaonan’ny filohan’ny Ankolafy efatra, mba tsy hampikatso indray ny raharaha. Ny tanjona, hoy i Saraha Georget Rabeharisoa, mitarika ity vondrona ity, dia ny hamerenana ny hasin’ny safidim-bahoaka amin’ny fifidianana. Nanamafy koa i Gilbert Raharizatovo fa tsy afa-miala amin’izao tontolo izao isika amin’ny famahana ity krizy ity, ka ny vahaolana mitondra mankany amin’izay hahazoana fankatoavana iraisam-pirenena no lalana. Mandrapahatonga izay dia hanohy ny dinika hampifanatonana ireo samy hafa hevitra, indrindra ireo nifandrafy tato anatin’izao krizy izao izy ireo.

Nangonin’i Jean D.

Tia Tanindrazana

Samia mijoro ho an'i Gasikara.