Politique

Partagé sur :
• facebook

Nanoloana ny fiantsoan’ny Cnosc azy ireo omaly takariva dia nivory tao amin’ny foiben-toeran’ny antoko Tiako i Madagasikara tao Bel’Air ny maraina ireo lohandohan’ny mpisorona ao amin’ny Ankolafy Ravalomanana.

 Nambaran’Atoa Roland Ravatomanga, iray amin’ireo mpitarika ity ankolafy ity, fa tsy manda ny dinika amin’izay fitadiavam-bahaolana hialana amin’izao krizy lavareny izao ry zareo ka nanaiky ny fanasan’ny Cnosc. Amin’ity ankolafy ity anefa dia mazava ny resaka fa tsy misy soso-kevitra vaovao aroso intsony fa efa tany alohan’i Sandton ny fandefasana soso-kevitra.

Nambaran’Atoa Roland Ravatomanga fa ny fampiharana izay tapaka tany Sandton no mety iaraha-midinika ka ny pitsopitsony kely mety tsy hitovizan-kevitra no hitadiavam-bahaolana. Heveriko anefa, hoy Atoa Roland Ravatomanga, fa izay fahatongavan’ny Filoha mirahalahy izay no ho antoky ny fampihavanana tanteraka ka tokony ho avy izy ireo.

Mikasika ny fitsanganan’ny GMMR dia tsotra ny teny nambaran’ity mpitari-tolon’i Magro ity. Voalohany, raha te hanangana antoko na ankolafy vaovao ny fikambanana vaovao manao politika eto Madagasikara dia angamba fahendrena ho an’ny rehetra ny tsy mampiasa ny anarana niaviana fa matoa misintaka dia efa tsy ao anatin’ny antoko intsony izany. Faharoa, efa niaraha-niaina fa tsy maintsy ny «Chef de file» no tompon’ny fanapahana farany ao amin’ny Ankolafy tsirairay. Ka raha ny GMMR dia fantatra fa tsy nahazo alalana tamin’io «Chef de file» io ka tsy tokony hiteny amin’ny alalan’ny Ankolafy Ravalomanana mihitsy. Dia mbola nohamafisiny koa fa raha mitady fankatoavana iraisam-pirenena izany dia ny sori-dalana tokana miainga amin’i Sandton no noraisin’ny SADC ary entin’ny Troika eto. Ny tompon’ny fanapahan-kevitra farany dia ny fivoriamben’ny SADC.

Manohy

Tia Tanindrazana

Samia mijoro ho an'i Gasikara.