Politique

Taorian�ny Maputo Tanterahina ny andininy faha-20, hiverina an-dapa ny Zanak�i Dada

Politique
Alatsinainy 20 Aogositra 2012

Hiverina an-dapa ireo olom-boatendry avy amin�ny ankolafy Ravalomanana.

Ny filoha teo aloha Marc Ravalomanana sady filohan’ny ankolafy Ravalomanana no nanambara ofisialy izany omaly, nandritra ny valandresaka nataony tamin’ny mpanao gazety tao Bel’Air, foiben-toeran’ny antoko Tiako I Madagasikara sy ny ankolafy Ravalomanana, tamin’ny alalan’ny antso an-tariby nivantana avy any Afrika Atsimo. Io izany no anisan’ny vokatra iray (lehibe), nateraky ny fihaonamben’ireo filoham-pierenena sy lehiben’ny governemanta eo anivon’ny Vondrona SADC notanterahina tatsy Maputo Afrika Atsimo ny 17-18 aogositra teo. Nohenoina ny ankolafy Ravalomanana no dikany raha tsorina ary dia fahombiazana ho an’ity farany iny fihaonana iny.

Nambaran’ny filoha Ravalomanana rahateo fa izy no nangataka ny handinihana ny raharaha Madagasikara mandritra ny fihaonana antampon’ny SADC, ka nahatonga ny fanasana ofisialy azy sy Andry Rajoelina hiatrika izany, mba hahafahan’ny andaniny sy ny ankilany manazava ny zava-misy marina indrindra taorian’ny nanaovana sonia ny tondrozotra tamin’ny 17 septambra 2011. Ho an’ny ankolafy tarihiny dia nampahatsiahy ny filoha Marc Ravalomanana fa efa nandefa taratasy mirakitra ny tsy fanajana sy fitongilanana amin’ny fampiharana ny tondrozotra tamin’ny filoha Jacob Zuma, nitarika ny Troika ; Dr Tomaz Salomao, Sekretera mpanatanteraky ny SADC ary i Eduardo Dos Santos, filohan’ny SADC tamin’ny fivoriana tany Luanda, ny 31 mey sy 01 jona 2012, ankoatra ny taratasy in-droa miantoana, ny 09 mey 2012 nataon’Atoa Mamy Rakotoarivelo, lehiben’ny delegasiona ankolafy Ravalomanana sy ny 27 mey 2012 nataon’Atoa Marc Ravalomanana, milaza fa misintaka tsy nandray anjara amin’ny fivoriana rehetra na eo anivon’ny Kongresin’ny tetezamita na ao amin’ny Filankevitra ambonin’ny tetezamita na ny filankevitry ny governemanta na filankevitry ny minisitra ny ankolafy tarihiny, mandra-pazava ireo teboka mampifanolana amin’ny fanatanterahana ny tondrozotra. Nandray ny andraikiny ny SADC nandritra ny fivoriana tany Maputo, araka ny nambarany ary dia izao hiverina an-dapa izao ny olony. Mikasika ilay fihaonana farany teo tao Maputo dia nisy teboka telo mazava nambaran’Atoa Marc Ravalomanana. Voalohany : nankatoavin’ny SADC ny tetiandrom-pifidianana nofaritan’ny CENIT niaraka tamin’ireo manampahaizan’ny Firenena Mikambana.

Faharoa : tsy anjaran’ny SADC no manakana na tsy mamela ny olom-pirenena hilatsaka hofidiana amin’ny fifidianana demokratika, koa dia malalaka ny filatsahan-kofidian’ny rehetra izay vonona ho amin’izany hoy izy. Fahatelo : tsy maintsy tanterahina tanteraka an-tsakany sy andavany ny tondrozotra, anisan’izany ny adininy faha-20, milaza fa tsy misy fepetra ny fodian’ireo sesitany noho ny antony politika, ka anisan’izany ny tenany, Marc Ravalomanana ary koa ny fahalalahana maneho hevitra sy ny fahalalahan’ny asa fanaovan-gazety. Handray an-tanana ny fanafainganana an’io ny Troika, izay ry zareo Tanzaniana no mitarika azy taorian’iny fihaonana tany Maputo iny, araka ny nambarany hatrany. Hisy ny delegasiona halefan’ny Troika, tsy ho ela, eto Madagasikara handamina izay mba ho anatin’ny fitoniana ary dia hohamafisina ihany koa ny birao fifandraisan’ny SADC.

Mikasika ireo jeneraly telo niaraka tamin’i Andry Rajoelina tonga tany Maputo dia nambaran’ny filoha Marc Ravalomanana, fa nametrahan’ny filoha zambianina fanontaniana izy ireo, toy ny hoe : Iza no iza ? Inona no isakananareo olona tsy hiverina an-tanindrazana ? Fanontaniana mipetraka ihany koa ny hoe hevitry ny besinimaro sa vitsivitsy eo anivon’ny tafika no entin’izy ireo ? Ankoatra izay dia nampahatsiahy Atoa Ravalomanana fa valo taona no naha filoha ambonin’ny foloalindahy azy, fony izy teo amin’ny fitondrana, ka nilazany fa tokony hisolo isaky ny telo taona, raha ela, ny tompon’andraikitra amin’ny fibaikoana ny tafika. Tsy tokony hiditra na hitsabaka amin’ny lafiny politika koa izy ireo. Nametrahan’ny mpanao gazety fanontaniana koa izy mikasika ilay raharaham-pitsarana azy atsy Afrika Atsimo, vokatry ny fitorian’ny AV7 momba ny raharaha “7 febroary”. Valin-teny ampitoniana sy feno fahatokisan-tena no nilazany fa tokony hotohizana hatramin’ny farany ny fanadihadiana iny raharaha iny, hivoahan’ny marina.

Rehefa izay dia nambarany fa mampametra-panontaniana ireo mpisolovava sy mpitsara afrikanina tatsimo ny fisehon-javatra, hoy izy, satria toa tsy matoky ny fitsarana aty Madagasikara. Nahoana ihany koa, hoy izy, no nesorina ny 31 jolay 2012, iray andro tsy handehanan’ny raharaham-pitsarana ny antontan-taratasin’ady ? Ankoatra izay dia sady tsy azo hanenjehana ahy no tsy ampy hilazana fa “crime contre l’humanité” ny zava-nitranga, hoy izy.

Teo am-pamaranana no nilazany fa miantso ny FFKM sy ny CNOSC hanampy amin’ny fanatanterahana ny fampihavanam-pirenena ny SADC. Hanao ny fivoriambe fanaony isan-taona ny Firenena Mikambana, afaka iray volana, ka dia mila mieritreritra isika satria amin’io fotoana io no handinihana ny hanafoanana na tsia ny sazy mihatra amin’i Madagasikara.

Nangonin’i Jean D.