Politique

Tabera Randriamanantsoa Nampiongana mpitondra ny sakantsakana teto Madagasikara

Politique
Sabotsy 29 Jolay 2017

Matoam-baovao hatreto ny fandavan’ny prefektioran’Antananarivo ny fankalazana malalaka ny faha-15 taona niorenan’ny antoko Tiako I Madagasikara ao amin’ny kianjaben’i Mahamasina.

Nohamafisin’i Tabera Randriamanantsoa fa adihevitra tsy mitombina ny fandraran’ny mpitondra mahefa izany. Mbola ahiahy amin’ny mety hisian’ny korontana no nolazain’ny solontenam-panjakana momba io tsingerintaona io, araka ny fanamarihany. Ny miaro ny olona sy ny fananany no adidin’ny mpitandro ny filaminana fa tsy misakana azy hiditra ao amin’ny toerana nofinidiny hankalazana am-pilaminana ny fety. Manamora ny asan’ny polisy sy zandary ary miaramila rahateo ny fanaovana lanonana ao anatin’ny faritra mifefy satria mijanona amin’ny fitandroana ny fahalemana ety ivelany ny andraikitra sahanin’izy ireo, hoy ity mpanao politika ity. Ny fandraisana fanapahan-kevitra politika diso tahaka ny misy ankehitriny no nampiala ireo mpitondra firenena nifandimby teto Madagasikara, araka ny fampahatsiahivan’ny filohan’ny antoko Kintana. Nitarika fahatezeram-bahoaka hatrany mantsy ny sakantsakana hetsika avy amin’ny mpitondra manampahefana teto Madagasikara.

Ramano F.