Politique

Partagé sur :
• facebook

Raha nanambara ny filohan’ny FAT, Andry Rajoelina, ny 31 aogositra lasa teo fa hotanterahana ato ho ato ny sonian’ny sori-dalana na misy na tsy misy SADC, dia niova indray izany ka lasa hiandry ireo Troïka indray amin’ny fanapahan-kevitra farany.

 Niara-nifanaiky indray mantsy ry zareo V8, dia ireo vondrona valo nanao rangopohy teny Ivato rehefa avy nifampidinika tamin’i Andry Rajoelina teny Iavoloha omaly maraina, fa hiara-kanao sonia ny sori-dalana rehefa tonga eto ireo Iraka avy any ivelany. Araka ny nambaran’i Pety Rakotoniaina, nitondra tenin’izy ireo tao Antaninarenina, omaly dia zava-dehibe ny anjara andraikitry ny vondrona iraisam-pirenena amin’ny famahana ny olana eto amintsika. Araka izany, dia nanangana komity izy ireo hifanatona handresy lahatra ny Ankolafy telo. Komity izay ahitana olona telo avy isam-bondrona raha ny fanamarihana. Tsy fotoana fizahozahoana intsony mantsy izao raha ny nambaran’i Pety Rakotoniaina ihany, fa fampandeferana ny hambompo rehetra mihitsy. Anisan’ny nanamarika ity fanapahan-kevitra niraisana ity ihany koa ny tsy hisian’ny fifidianana amin’ity taona ity.

Voalaza ihany koa fa mandritra ny fotoana hanatanterahana ny sonian’io tondrozotra nasiam-panovana io no hanapaka ny tetiandrom-pifidianana izy ireo, hamita ny lisi-pifidianana, hanitsy ny rafitry ny CENI, hamita ny famotsoran-keloka, hanapaka ny fanovanana fanitsiana ny rafi-pitondrana tetezamita ihany koa. Tsy nisy namaritra ihany koa anefa tamin’ireto vondrona ireto ny hoe ilay tondrozotra nasiam-panovana amin’ny endriny manao ahoana ity hosoniavina ity. Ity farany izay anisan’ny manintona ny sain’ny maro ankehitriny.

Tsinjo tamin’ny fihaonan’ny V8 tamin’ny mpanao gazety omaly fa nisy tsy fifanarahana ihany tamin’ireo vondrona sasany izay nipatitaka, toy ny Escopol sy ny HPM. Tsy nisy nahazoana fanazavana anefa izy ireo.

Manohy

Tia Tanindrazana

Samia mijoro ho an'i Gasikara.