Politique

Partagé sur :
• facebook

Nanaraka ny toromarika amin’ny tokony hijanonanay Parlemantera eto Antananarivo amin’izao fotoana mavaivay eto amin’ny firenena izao izahay avy any Atsimo Andrefana, hoy ny CST Remara Louis sy ny CT Sazalahy Tsianihy.

 Anisan’ireo delegasion’ny ankolafy Ravalomanana nanatitra taratasy teny amin’ny birao fifandraisan’ny SADC teny Ivandry izy ireo. Ny dikan’iny dia tsotra, hoy ry zareo : satria ny SADC no nanao ny fanelanelanana teto ary nahatonga ny fanaovan-tsonia ny sori-dalana ka nampahatsiahy azy ireo ny ankolafy Ravalomanana hoe : aiza ho aiza ny fanatanterahanareo ny andininy faha-16, 17, 18 ary faha-20 amin’io sori-dalana nampanaovanareo sonia ny ankolafy politika maro eto Madagasikara io ? Izay zavatra izay no hitadiavanay valiny ato anatin’ny fotoana fohy, fa raha tsy misy izay dia handray andraikitra izahay.

Ny antony faharoa, matoa izahay nitondra vahoaka teny fa tsy navelanay ho adidin’ny filoha Mamy Rakotoarivelo irery izany dia noho ny fitakianay ny fialan’i Andry Rajoelina tsy ho filohan’ny tetezamita intsony satria raha izy no mbola filohan’ny tetezamita dia tsy tafavoaka amin’ny krizy ny Malagasy ary manjaka eto ny fitantanana gaboraraka toy izany koa ny tsy fandriampahalemana. Eo ambanin’ny fifehezan’ny sori-dalana daholo na ny nanao sonia azy na ny tsy nanao izany ka ny fanesorana tamin’ny toerany ny minisitry ny tontolo iainana Dr Randriamiandrisoa Joseph dia tsy ara-dalàna fa izay nanolotra azy ihany no afaka manala azy. Ka ny didim-panjakana navoaka andro alina dia tsy tokony hialan’ity minisitra ity eo amin’ny toerana mihitsy. Mazava, hoy ireto CST sy CT avy any Atsimo Andrefana ireto, fa manelingelina ny FAT tsy ahafahany manao tantely afa-drakotra ny vola ao amin’ny orinasa Fanalamanga no nanesorana ny minisitra Randriamiandrisoa tamin’ny toerany. Dia mbola resaka fakana vola ankolafa koa no antony nividianana ilay Airbus A340-300 brokantera, hoy ireto Parlemantera avy amin’ny ankolafy Ravalomanana ireto.

Manohy

Tia Tanindrazana

Samia mijoro ho an'i Gasikara.