Sazalahy Tsianihy

Partagé sur :
• facebook

Mitaky ny fialan’i Atallah Béatrice filohan’ny CENI-T sy ny fandravana fanindroany ny mpikambana CES tarihan’ny filohany fa tsy ara-dalàna no tsy manara-dalàna ary koa mitaky ny fanemorana ny datim-pifidianana nofaritan’ny CENI-T farany teo izahay, hoy i Sazalahy Tsianihy.

Misy ny antony tsy azo anoharana, hoy ity mpikambana ao amin’ny Kongresin’ny tetezamita avy amin’ny Ankolafy Ravalomanana ity. Tamin’ny fandalovan’ny rivodoza Haruna tany amin’ny Faritra Atsimo Andrefana dia maro ny trano rava sy fotodrafitrasa potika tsy mbola tafarina hatramin’izao. Maro koa ny very fananana sy tsy manana fonenana hipetrahana. Manjaka ny asan-dahalo sy ny asan-jiolahy, ny fandrobana fananan’olona, ny fandoroana tanàna arahina fanolanana zaza amam-behivavy. Tsy tomombana ny hetsika fanaovana kara-panondrom-pirenena ho an’ireo tanora tonga taona ka zary tsy ho afaka hifidy. Mirongatra ny andiam-balala manerana ny Nosy, mananontanona ny mosary amin’ity taona ity. Ritra ny kitapom-bolam-panjakana, tsy mandoa afa-tsy ny karama. Hatramin’ny rahoviana ny fetran’izany ? Tsy eken’ny lalàna ny fanaovana fifidianana amin’ny fotoam-pahavaratra fiavian’ny orana. Tsy voahaja ny 90 andro hanaingana ny mpifidy handatsa-bato. Tsy feno ny fepetra hanatanterahana ny fifidianana, hoy i Sazalahy Tsianihy. Milaza ity farany fa ny fampihavanana ataon’ny FFKM ihany no lalan-tokana hampisy fitoniana sy hivoahantsika amin’ny krizy ary hampisy fifidianana anaty filaminana eto Madagasikara.

Tia Tanindrazana

Samia mijoro ho an'i Gasikara.