Politique

Partagé sur :
• facebook

Nandritra ny hadimiana no nanofanana ireo Ben’ny tanàna sy ireo filohan’ny filankevitra ary ny mpitantam-bolan’ny Kaominina teo anivon’ny Faritra Atsinanana, nampahafantarana azy ireo ny lalàna sy ireo fepetra tsy maintsy arahina amin’ny fitantanana ny Kaominina.

 Nozaraina roa ny mpiofana ho an’ny Faritra Atsinanana, ka ny avy ao Toamasina I sy Toamasina II ary Brickaville natao teo anivon’ny renivohitry ny Faritra, ny avy ao Vatomandry, Mahanoro sy Antanambao Manampontsy ary Marolambo kosa dia tao Vatomandry no natao ny fanofanana azy ireo. “Izao ianareo Ben’ny tanàna vao tena olom-panjakana marina. Fantatrareo tsara ny lalàna sy tsy maintsy atao amin’ny fitantanana ny Kaominina sy fomba fampidiram-bola hahafahan’ny Kaominina mandroso ary ny fiaraha-miasa eo amin’ny rehetra ho tena mampandroso fa tsy fototry ny adin’ny Ben’ny tanàna sy ny filankevitra”, hoy ny minisitry ny fitsinjaram-pahefana, Rtoa Ruffine Tsiranana, raha namarana ny fanofanana tao Toamasina.

Avy tany Maroantsetra sy Mananara Avaratra izy izao tonga tao Toamasina I izao. “Tsapanay fa anisan’ny olana tsy nampandeha ny Kaominina ireo nampiofanana anareo ireo, nisy rahateo ny fanadihadiana natao taloha nanomanana azy ity noho ireo lesoka hita, ka mitarika ny fanenjehan’ny fitsarana ny Ben’ny tanàna”, hoy hatrany Rtoa Minisitra. Nisy moa ny fizarana mari-pandraisana anjara ho an’ireo Ben’ny tanàna sy ny filohan’ny filankevitra nandray anjara tamin’ny fanofanana. Nisy koa ny fizarana ny karatra maha Ben’ny tanàna azy ireo mba hamantaran’olona fa olom-panjakana sy manampahefana ny Ben’ny tanàna amin’ny maha olom-boafidy azy, nefa matetika dia ailika sy ataon’olom-boatendry sy ny mpanao politika tsinontsinona mihitsy.

Am-bava fotsiny

Nandritra ity lanonana ity no nararaotana an-dRtoa Ruffine Tsiranana nanontaniana ny heviny mikasika ny fampiatoana amin’ny asany ireo minisitra “Zanak’i Dada”, ka nilazany fa “tsy misy taratasy mirakitra izany hatramin’izao fa am-bava fotsiny no nanambara izany. Manohy ny asanay izahay ary tsy mahasakana anay amin’izany ny fampiatoana anay, satria ny fanajanay tondrozotra no mahatonga anay nandray anjara tao anatin’izao fitondrana izao”. 

Rakoutou 

Sary : Ny minisitry ny fitsinjaram-pahefana, Rtoa Ruffine Tsiranana (afovoany) raha namarana ny fanofanana Ben’ny tanàna tao Toamasina

ENCADRE 

Faritra 15 amin’ny 22 no efa nahavitana fanofanana hatreto. Ezahina hovitaina alohan’ny faran’ny volana septambra 2012 ny fanofanana ireo sisa.

Tia Tanindrazana

Samia mijoro ho an'i Gasikara.