Politique

Partagé sur :
• facebook

Niranty tao amin’ny Magro Tanambao V ireo ampamoaka lehibe nataon’ny Profesora Zafy Albert, nanaovany vaky bantsilana ny vokatry ny tsy fahaiza-mitantana nataon’ny FAT tao anatin’ny 3 taona.

 Tamin’ny alalan’ny sorabaventy no nanehoana izany. Samy gaga sy taitra avokoa ny nahita izany, na ireo mpandalo, na ireo mpitolon’ny Rodobe niatrika ny hetsika ny sabotsy teo. Ankoatra izay dia nifandimby nanazava ny fipetraky ny raharaha politika sy ny mikasika ny tondrozotra ireo nandray fitenenana. Ho an’i Kotomanantsoa Rémi, dia nambarany fa “fandresena ny fahavitan’ny sonia iny tondrozotra iny, raha nihevitra zavatra nifanohitra tamin’iny ny FAT sy ny mpiara-dia aminy. Ho hitantsika eo ny tohin’ny raharaha satria dia hiverina eto indray ny iraky ny Troika, ny talata izao”. Ny Me Rasamimaka Mahefalahy kosa dia nanipika mazava fa “tsy hisy fankatoavana izany eto raha tsy hajaina iny tondrozotra iny”. Raisiny ho fanambaniana ny asan’ny vaditany kosa ny fikasan’ny FAT handefa “commando” folo hisamborana ny filoha Marc Ravalomanana ao Afrika Atsimo. Nahitsy kosa ny tenin’i Victor Hong nilaza fa “isaky ny manao raha manjary ny mpitondra iray dia aongana foana eto amintsika, misy ireo olona tena mpanao izany eto ary mbola ao anatin’ny FAT ankehitriny, ka izay no mahatonga izao zava-misy misaritaka sy miovaova be izao”. Anisan’ny niditra tamin’ny antso an-tariby nivantana nitondra fanazavana sy nankahery ny mpitolona rodobe Toamasina koa ny mpitarika ny GTT Genève, Rtoa Patricia Lehmann sy Rasolofoniaina Darsot, izay nilazan’izy ireo ny hanohizana hatrany ny tolona ary tsy hatahotra hilaza ny marina.

Rakoutou

Tia Tanindrazana

Samia mijoro ho an'i Gasikara.