Politique

Razafimanantsoa Hanitra

Politique
Alakamisy 03 Aprily 2014

�Mitaky hatrany ny fampiharana ny tondrozotra izahay�

Korontana no nitranga teto amin’ny firenena nanomboka tamin’ny taona 2009. Voakasik’izany manokana ireo andrim-panjakana tetezamita napetraka. Takaitran’ny tsy fanarahan-dalàna no mitranga ankehitriny eo anivon’ny Antenimieram-pirenena izay misy akony amin’ny fanendrena ny praiminisitra, hoy ny solombavambahoakan’i Madagasikara Razafimanantsoa Hanitra. Lesoka goavana amin’izao fitondrana voafidim-bahoaka izao ny fahasahiranana miverina amin’ny tany tan-dalàna dia ny fanajana ireo voasoritra ao anatin’ny Lalàmpanorenana ka samy mandrirotra amin’izay mahamety azy ireo antoko na vondrona politika milaza ho maro an’isa. Efa hita soritra hatramin’ny fivoriana ara-potoanan’ny Antenimieram-pirenena voalohany ny tena vondrona parlemantera maro an’isa manohana ny filoham-pirenena, araka ny voalazan’ny andininy faha-54-n’ny Lalàna fototra saingy ny fametrahana ny fomba fiaraha-miasa eo amin’ireo solombavambahoaka no tsy maintsy narindra, hoy ny depiote Razafimanantsoa Hanitra. Aminy dia rariny sy hitsiny iny fanapahan-kevitra noraisin’ny Fitsarana avo momba ny Lalàmpanorenana nandrava ny rafitra mpanapa-kevitra ao amin’ny andrim-panjakana mpanao lalàna iny.

Mitohy ny tolona ho an’ny ankolafy Ravalomanana

Tsy miova amin’ny foto-kevitra efa nijoroany hatramin’ny nisian’ny fanonganam-panjakana tamin’ny 2009 ny ankolafy Ravalomanana. Mitaky hatrany ny fampiharana ireo andininy tsy mbola tanteraka ao amin’ny sori-dalana izahay, hoy i Maître Hanitra izay vao nampahatsiahivin’ny GIC-M tamin’ny fivoriany farany teo teto Antananarivo. Ny paikady hitondrana azy fotsiny no tsy maintsy harindra miaraka amin’ny fizotran’ny raharaham-pirenena. Anisan’izany ny fametrahana fiaraha-miasa miaraka eo amin’ny ankolafy sy ny filoham-pirenena vaovao izay mitaky fifanarahana eo amin’ny fomba fijery sy ny fampiharana azy. Miara-dalana amin’ny filohan’ny Repoblika voafidim-bahoaka ny ankolafy Ravalomanana satria mendrika ny hotohanana ny fandaharanasany, hoy ny fanampim-panazavany. Mpanohitra kosa ireo vondrona solombavambahoaka manana fandaharanasa hafa sy tsy mifanaraka amin’ny programan’ny filoham-pirenena. Aorian’ny fanolorana sy fanohanan’ny praiminisitra ny fandaharanasan’ny filohan’ny Repoblika eny amin’ny Antenimieram-pirenena vao tena ho fantatra ireo mpanohitra izay tsy maintsy hifidy ny ho lehiben’izy ireo eny amin’ity rafitra mpanao lalàna ity.