Politique

Ravalomanana Marc Mila fahasahiana ny fanovana governemanta

Politique
Talata 23 Febroary 2016

�Tsy tokony hipetraka amiko ny fanontaniana mikasika ny fanovana ny governemanta�, hoy ny filoha teo aloha Ravalomanana Marc.

Mihazohazo anefa ny filohan’ny Repoblika manoloana ireo mangataka ny hanaovana izany sy ireo mpiara-miasa manodidina mitady hijanona amin’ny toeran’izy ireo. Mila fahasahiana ny fandraisana fanapahan-kevitra tahaka izany, araka ny fanazavany. Vonona foana ny hifanome tanana amin’ny filohan’ny Repoblika anefa ny antoko Tiako I Madagasikara, araka ny fanazavan’ny filoha nasionalin’ny TIM. Mamono tena ny fitondram-panjakana nahazo salan’isa 64% raha betsaka indrindra tamin’ny fifidianana mitady hifehy irery ny fitantanana ny firenena ka tsy misokatra amin’ny fiaraha-miasa, hoy ihany i Dada. Midika ho tsy fisian’ny fifandresen-dahatra sy fifanakalozan-kevitra mantsy izany fihetsika izany. «Lesona goavana hitako tany Inde ary fakan-tahaka ho an’ny mpanao politika Malagasy ny fijoroan’ny mpanohitra manitsy sy mitsikera ny zavatra tsy mety rehetra ataon’ny mpitondra fanjakana fa tsy mba manongana», hoy ny filoham-pirenena teo aloha.

Ramano F.