Politique

Partagé sur :
• facebook

 Naverin’ny mpikambana ao amin’ny Kongresin’ny tetezamita Rakotoniaina Jean Gringo ny fanontaniana ho an’i Jean napetraky ny Tia Tanindrazana omaly nanoloana ny famonoan’ny dahalo tany amin’ny Fokontanin’i Fenoanevo, Kaominina Manolobe, Distrikan’i Bezaha Toliara ny Adjidà Alphonse Bernard ny talata teo : “Iza intsony no hiaro anay vahoaka fa hatramin’ny mpitandro ny filaminana aza ity matin’ny dahalo ?”. Amin’ny fo malahelo sy mahonena no hilazako etoana, hoy ity mpikambana amin’ny Kongresin’ny tetezamita avy any Bezaha ity, ny nahafatesan’ny namana Komadàn’ny Borigadin’ny Zandarimaria ao Bezaha Toliara teo am-panaovana ny asany hampandry fahalemana ny Distrika izay misy anay ao Betioky, indrindra ny faritra Avaradrano any Bezaha. Vao tamin’ny roa volana lasa izy ity, hoy izy, no efa voatifitry ny dahalo teo amin’ny tanany sy tongony ary nentina notsaboina tany Toliara kanefa izao tsy navelany izao raha tsy maty.

Koa mangataka ny fitondram-panjakana isan’ambaratongany ny tenako, hoy Rakotoniaina Gringo, mba hijery haingana ny toe-draharaha fa tsy ho variana amin’ny adilahy politika eto Antananarivo eto fotsiny. Tsarovy, hoy izy, fa miankina amin’ny fandriampahalemana eny amin’ny vahoaka maro an’isa ny fiainam-pirenena amin’ny ankapobeny. Mila vahoaka mitony sy milamina, hoy ihany izy, ny Faritra tsirairay avy amin’izao fanomanana ny fifidianana ho avy izao. Tsy tokony ho najanona mihitsy ilay “Opération tsy mitsitsy”, hoy izy, raha tsy azo sambo-belona i Retsifa, lehiben’ny dahalo any an-toerana. Mahitsy ihany koa ny tenin’ity CT ity amin’ny fangatahana ny hanomezana fitaovana arifomba sy manara-penitra hoentin’ny mpitandro ny filaminanana manatanteraka ny asany.

Manohy

Tia Tanindrazana

Samia mijoro ho an'i Gasikara.