Politique

Praiminisitra tany Frantsa Tsy mazava ny anton-dia

Politique
Talata 01 Martsa 2016

Anio no hody an-tanindrazana ny praiminisitra Ravelonarivo Jean rehefa avy nanao fitsidihana tany Frantsa nandritra ny herinandro latsaka kely.

Araka ny tatitra fanambarana ny akon’ny dian’ity lehiben’ny governemanta ity tany Frantsa dia tsy nisy ny fihaonany tamin’ny mpitondra fanjakana frantsay na dia minisitra iray aza. Mpandraharaha sy olon-tsotra misahana ny tontolon’ny toekarena sy ny sehatra ara-tsosialy ary ny mpitarika ny fikambanana miaro ny zon’olombelona sy mpamatsy rano fisotro madio no nihaona taminy. Nanambara moa ny tompon’andraikitry ny serasera eo anivon’ny fiadidiana ny praiminisitra fa mbola hitondra fanampim-panazavana misimisy kokoa mikasika ny akon’ny diany tany Frantsa ny praiminisitra. Raha miresaka fivahinianana arak’asa any Frantsa mantsy, araka ny efa nampahafantarina ny vahoaka malagasy talohan’ny niaingany ny praiminisitra, dia mby tonga ao an-tsaina ny famerenana amin’i Madagasikara ireo nosy malagasy ( îles éparses) sy ny fanomanana ny fandraisana ny fivoriana faratampon’ny frankofonia na ihany koa ny momba ny fitantanana ireo seranam-piaramanidina. Toa tsy misy resaka any anaty tatitra fampitam-baovao anefa ny momba ireo, ka mampametra-panontaniana ihany hoe inona marina ary izany no tena anton-dian’ny jeneraly Ravelonarivo tany Frantsa ?

Andry Ratovo