Politique

Politikam-panjakana Mila hampihavanina amin’ny hetahetam-bahoaka

Politique
Alarobia 09 Aogositra 2017

Mila alamina ny savorovoro misy eto amin’ny firenena amin’izao herintaona mialohan’ny fifidianana filohan’ny Repoblika izao, hoy ny AKFM (Antokon’ny Kongresin’ny Fahaleovantenan’i Madagasikara).

Ady hevitra mbola misokatra hoan’ny antoko politika sy ny firaisamonim-pirenena hatramin’izao mantsy ny lalàna mifehy ny fifidianana noketrehin’ny CENI (Commission Electorale Nationale Indépendante). Tsy resy lahatra amin’ny fahaleovantenan’io vaomieram-pifidianana nasionaly mahaleotena io rahateo ny ampahany betsaka amin’ny hery velona eto Madagasikara, hoy ny filoha nasionalin’ny AKFM Eric Rakotomanga. Mihevitra ihany koa ny tenany fa zava-dehibe ny fijeren’ny mpitondra ny fiainana mendrika kokoa tokony hisitrahan’ny vahoaka Malagasy manoloana ny fahantrana lalim-paka mianjady aminy. Laharam-pahamehana amin’izao fotoana ohatra ny fampihavanana ny politikam-panjakana tsy mifandraika velively amin’ny hetahetan’ny mponina. Antony manosika ny mpanohitra hitaky ny fialàn’ny mpitondra mialohan’ny fe-potoana voalazan’ny Lalàmpanorenana ankehitriny, araka ny fomba fijerin’ity mpitarika antoko ity, ny hantsana be mampisaraka ny vahoaka maro an’isa fadiranovana sy ireo ampahan’olom-bitsy migalabona amin’ny harem-pirenena.

Ramano F.