Politique

Paul Rabary �Ady mahery vaika no tokony hatao�

Politique
Talata 11 Septambra 2012

Amin'ny maha mpandinika fiarahamonina azy dia manana ny heviny momba ny firongatry ny asan-dahalo any atsimo i Paul Rabary. Rehefa nangina tao anatin'ny roa volana ny tenany dia namelabelatra ny fomba fijeriny tao amina onjam-peo tsy miankina iray, eto an-drenivohitra omaly antoandro.

Zaraina 3 ny firenena

Hentitra ny filazany fa tsy asan-dahalo tsotra, tahaka ny nahazatra hatramin'izay ny mitranga any atsimo, fa efa tetika hampizarana an'i Madagasikara. Tandindomin-doza tanteraka ankehitriny ny fiandrianam-pirenena, hoy i Paul Rabary satria misy vondron'olona mitady hampizara ho 3 ity Nosy ity, dia ny atsimo, afovoany ary avaratra. Misy mpandraharaha, mpanao politika ary malaso ao anatin'ireo miketrika an'izany, hoy ihany izy. Araka ny resaka nifanaovana tamina olona maro eto Antananarivo sy avy any amin'ny faritra dia misy ny fanangonana rezervista sy bokon'ozatra any ambadimbadika any, mba hanatevin-daharana ny dahalo any atsimo, hoy hatrany i Paul Rabary.

Nomarihan'ity mpandinika fiarahamonina ity fa efa tetika hatry ny ela ny fizarazarana an'i Madagasikara, noresahana teto ny "État fédéré" tamin'ny 1991, nisy ny fisintahan'ireo Governoran'ny faritany 5 sy fanaovana fahirano an'Antananarivo tamin'ny 2002. Araka ny fandinihan'i Paul Rabary azy dia tanjona amin'ity asan-dahalo sy fampihorohoroana ity, ny fanapotehana ny endrika fanjakana any atsimo. Vonoina ireo zandary mpitarika, rahonana ny sefo Distrika, mety hitatra any amin’ireo Lehiben'ny Faritra, izany avy eo. Efa nisy rahateo ny sefo Fokontany maro, telopolo mahery, nametra-pialana; koa rehefa mitsoaka an-daharana sy mametra-pialana ireo solontenam-panjakana ireo dia maka toerana tsimoramora amin'izay ny dahalo, dia izy ireo no hitantana ny tapany atsimon'ny Nosy ny farany. Ho avy amin'izay avy eo ny fangatahana fahaleovantena dia tanteraka ilay fampizarazarana. Nanamarika ihany koa i Paul Rabary fa mivangongo eto Antananarivo ny fahefam-panjakana, izay mbola azo atao hoe matanjaka, koa nikaroka fomba hafa ireo vondron'olona ireo, ka nokorontanina ny rafi-panjakana ifotony any atsimo ka rehefa rava io, dia hiforona ho azy ny fanjakana mahaleotena.

Manizingizina ity mpandinika fiarahamonina ity fa misy ambadika ara-toekarena sy ara-politika ny zava-mitranga any atsimo satria, efa mazava izao fa feno harena ankibon'ny tany toy ny solika, vatosoa, gazy, saribao iny faritra iny. Ireo harena be ireo no mahamaika sy dodona ireo ati-doha mikotrika ny fampizarazarana an'i Madagasikara amin'ny alalan'ny asan-dahalo, hoy i Paul Rabary. Ny zava-nitranga tany Soudan, Mali, Nigéria no tadiavina hatao eto, hoy izy.

Lanjan'ny grady

Raha tsy mitandrina ny mpitondra, ny foloalindahy ary ny mpanao politika dia ho tanteraka io fampizarazarana an'i Madagasikara io, hoy ihany izy. Aminy, ny mpanao politika rehetra dia tokony hanome tosika ny miaramila sy zandary na inona na inona firehany. Ho an'i Paul Rabary dia tonga ankehitriny ny fotoana tsy maintsy hanehoan'ny miaramila, fa mendrika ny grady iantsorohany izy ireo, ary tena tandroka aron'ny vozona marina. Maherifo ny miaramila, ka tokony hotohanana satria izy ireo sisa no miaro ny fiandrianam-pirenena, hoy izy. Nomarihany koa fa tena zava-doza ilay fanambaran'ny mpanao politika sasany hoe : tokony hifampiresaka amin'ny dahalo. Tsy resaka intsony izao no atao fa ady mahery vaika, hamongorana ifotony ny asan-dahalo, hoy i Paul Rabary. Ny namaranany ny famelabelaran-keviny moa dia ny hoe efa lalim-paka ny tetik'ireo olona mikasa ny hampizara an'i Madagasikara, ka vantany vao manambara fahaleovantena ny any atsimo dia hanao izany koa ny any avaratra.

Nangonin'i RTT