Politique

Partagé sur :
• facebook

Midehaka ny mpitondra ankehitriny fa hitobaka ny vola avy any ivelany, taorian’ny nanafoanan’ny Vondrona Eoropeanina ny sazy nihatra tamin’i Madagasikara hatramin’ny 2009 noho ny fanonganam-panjakana nitranga teto ka nampihantona ireo famatsiam-bola efa azo. Hatrany amin’ny 2 miliara dolara no voalaza fa ho azon’i Madagasikara.

 Trosa vaovao io. Asa moa na fifanandrifian-javatra fotsiny na nampifanojoana mihitsy fa nifanotona ny andron’ny 19 mey 2014 fanambarana nataon’ny Vondrona Eoropeanina sy ny Banky Iraisam-pirenena hanampy an’i Madagasikara. Na izany aza ny tsara homarihina ary tsy maintsy resahina dia nametraka fepetra ireo mpamatsy ny amin’ny hampiasana ny vola. Anisan’izany ny mangarahara amin’ny fitantanana. Tsy inona io fa ilay Teny Ifanomezana voalohany ao amin’ny Madagasikara am-perinasa (MAP), vinam-piarahamonina nampiharin’i Marc Ravalomanana hampandrosoana an’i Madagasikara. Halefa any amin’ny fanamboarana fotodrafitrasa, indrindra ny lalana, ny ampahany sasany amin’ny vola ho azo.

Io ilay Teny Ifanomezana faha-2 ao amin’ny MAP : “Fotodrafitrasa mifandray”. Hisy indray ampaham-bola natokana hanatsarana ny seha-panabeazana. Moa va tsy ny Teny Ifanomezana faha-2 ao amin’ny MAP no tiana hambara. Ny sasany indray hatokana ho an’ny fahasalamam-bahoaka. Teny Ifanomezana faha-5 ao amin’ny MAP izany. Ny fiarovana ny tontolo iainana moa dia mazava be fa fanatanterahana ny Teny Ifanomezana faha-7 ao amin’ny MAP. Aleo dia tsorina fa ny MAP no tena nahazoana vola e ! Inona tokoa moa no maharatsy ny hanohizana ny fanatanterahana ny MAP rehefa hita fa hitondra fampandrosoana an’i Madagasikara, rehefa tsy manana programan’asam-pampandrosoana mazava e ?

Tia Tanindrazana

Samia mijoro ho an'i Gasikara.