Politique

Partagé sur :
• facebook

“Faly aho, tena faly ary tsy haiko ny hilazana ny fifaliana ato anatiko mandre fa anisan’ny miara-paly amiko ianareo any Alaotra amin’izao andro lehibe amin’ny fiainako izao dia ny fitsingerenan’ny taona nahaterahako. Faly aho fa tsy nanadino ahy ianareo aty Alaotra. Ataoko ho anisan’ny laharampahamehana ny fihaonana aminareo raha vao migadona any aho tsy ho ela”.

 Izay no teny voalohany nambaran’ny filoha Marc Ravalomanana raha vao niditra mivantana tamin’ny antso an-tariby nandritra ny hetsika nokarakarain’ny Vondrona Olon-tsotra tany Ambatondrazaka izy ny folakandron’ny alatsinainy 12 desambra teo. Miandrandra sy maniry aho, hoy izy ny hiverenan’ny fiainan’ny Malagasy amin’ny laoniny amin’izay. Mivavaka sy maniry koa izy ny hananan’ny Malagasy rehetra hetaheta hiaraka hampandroso indray ny firenena sy hiverenan’ny firenena amin’ny ara-dalàna. Nisy ny fanomezana natolotry ny vahoaka azy tamin’io fotoana io izay nambarany fa nampihetsipo tokoa. Fankaherezana ny Malagasy rehetra tsy ho kivy amin’ny tolona izay atao no namaranany ny teniny. Nahatonga solontena betsaka tamin’ity hetsika nokarakarain’ny Vondrona Olon-tsotra tao Ambatondrazaka ity ny vahoaka tany amin’ny Faritra Ampitandrefana Alaotra. Hetsika nihodidina ny Akany Ambatondrazaka Fitiavana no nisantaran’izy ireo ity fankalazana ny tsingerintaona faha-62 nahaterahan’ny filoha Marc Ravalomanana ity, izay narahin’ny fotoam-pivavahana fohy ary nofaranana tamin’ny fiaraha-mitsaingoka sy fizarana mofomamy.

Niry A

Tia Tanindrazana

Samia mijoro ho an'i Gasikara.