Politique

Partagé sur :
• facebook

Tsy azo atao ny matoky tena na dia fantatra aza fa mbola tia an’i Dada ny ankamaroan’ny olona.

 Be dia be koa no nosimbain’ireo mpifanandrina izay tsy mipetra-potsiny fa efa mametraka ny azy ihany koa. Mila miasa mafy isika, hoy i Leriva Manahirana. Be dia be no mametra-panontaniana, hoy izy hoe maninona marina no mifikitra amin-dRavalomanana ho kandida ho filoham-pirenena ny ankolafy Ravalomanana. Betsaka ireo filoha nifandimby hatramin’izay, hoy ity mpikambana ao amin’ny Filankevitra ambonin’ny tetezamita ity fa niavaka i Marc Ravalomanana.

Tsy nisy filoham-pirenena nahavita lalana betsaka sy lavitra indrindra raha tsy Ravalomanana. Tsy nisy filoham-pirenena nampifaninana tantsaha amin’ny resaka voly vary koa hatramin’izay raha tsy izy. Raha mbola nitohy ny fitondrana Ravalomanana, araka ny fanazavany dia afa-pahasahiranana tamin’ny resaka vary sy sakafo ny Malagasy. Tsy manana olana amin’ny firesahana sy fandresen-dahatra ireo mpamatsy vola toy ny Banky iraisam-pirenena sy ny Tahirimbola iraisam-pirenena i Marc Ravalomanana, hoy ihany i Leriva Manahirana. Koa manoloana izao izao firenena efa tena latsaka amin’ny kizo izao, latsaka lalina loatra dia tsy misy kandida ankoatra an-dRavalomanana hahavita hanarina an’i Madagasikara.

Raha olom-baovao ankoatra an’i Dada, hoy ihany i Leriva dia tsy maintsy mbola hozahan’ireo mpamatsy vola toetra, toy izay efa natao an-dRavalomanana taorian’ny 2002. Hiteraka fahatarana indray eo amin’ny sehatry ny fampandrosoana izany raha olon-kafa no ho eo. Raha Ravalomanana kosa anefa, hoy izy avy hatrany dia tsy hiandry an-taonany isika fa avy hatrany dia mandeha ny asa. Nanentana ireo mpiara-dia aminy hiasa koa ity depioten’i Brickaville teo aloha ity, satria adidy goavana ny hampandany an’i Marc Ravalomanana. Manomboka izao ny fifandresen-dahatra eny amin’ny fiarahamonina, hoy izy.

Soa 

Tia Tanindrazana

Samia mijoro ho an'i Gasikara.