Politique

Komitin’ny fampihavanam-pirenena Tsy misy anay io, hoy i Tabera Randriamanantsoa

Politique
Zoma 15 Septambra 2017

Olona tena manam-piniavana hampihavana tokoa ireo mpikambana ao amin’ny komitin’ny fampihavanam-pirenena na ny CFM izay nahavita fianianana ny alarobia teo, hoy ny filohan’ny Antoko Kintana, Tabera Randriamanantsoa.

Ny olana mipetraka anefa dia ny lalàm-panorenana eto amintsika mihitsy no tsy mifanaraka amin’ny fampihavanana kasaina hatao. Nahoana no izay voakasiky ny raharaha 2002 sy 2009 ihany no tafiditra ao anatiny ? Ny antony dia satria ny filoha Ravalomanana sy Rajoelina no kendrena amin’io. Ny tiana hiaviana amin’ilay resaka “vérité et pardon” dia ny hilalaovana ny hoe Rajoelina nitondra vahoaka nihani-dapa ary Ravalomanana niaro ny lapa ka nampitifitra. Tokony hahazo famotsoran-keloka ve izy ireo ? Ny sary mety hitranga dia homena azy roalahy ireo ny famotsoran-keloka saingy tsy havela hilatsaka ho filoham-pirenena kosa. Nanamafy ny tenany fa tsy nandefa solontena ao amin’ny CFM ny CRN tarihiny, toy izany koa ny filoham-pirenena teo aloha, Zafy Albert, raha ny foto-kevitra nijoroana hatramin’ny nisian’ny ankolafin-kery Zafy Albert. Mandeha amin’ny anaran’ny tenany manokana izay niditra ao anaty CFM, hoy izy.

J. Mirija