Politique

Kandidà solombavambahoaka Maro ireo mbola nangataka fanazavana teny amin’ny OVEC

Politique
Alarobia 27 Febroary 2019

Tsy mbola mazoto angamba na manana paikady manokana ireo mpirotsaka hofidiana ho solombavambahoaka kanefa dia nisokatra omaly ny fotoana ahafahana mandray anjara amin`ny fifidianana ny 27 mey 2019 ho avy izao.

Hatreto, i Alain Mahavimbina, filohan`ny antoko GAR, no fantatra fa nandrotsaka ireo antontan-taratasy sy anto-bola tany amin`ny OVEC Toamasina I. Saika olona tonga mangataka fanazavana sy ireo antontan-taratasy hofenoina no betsaka ary manerana ireo OVEC manerana ny nosy no nahitana izany. Ho an`ny OVEC Tana III dia niisa 6 ireo olona nangataka fanampim-panazavana. Teny Atsimondrano kosa, miisa 8. Tany amin`ny faritra ihany koa, somary nangina ny teny amin`ny OVEC. Ho an`i Mahajanga I, niisa 14 ireo nangataka antontan-taratasy. Ankoatra ireo taratasy takian’ny lalàna aminy dia 5 tapitrisa Ariary ny vola antoka tsy maintsy harotsak’ireo maniry ny handray anjara amin’io fifidianana io any amin’ny Tahirim-bolam-panjakana mba hahafahany milatsaka hofidiana. Mbola manana hatramin`ny 12 martsa aloha ireo kandidà raha tapa-kevitra. Araka ny tetiandro napetraka dia ny 6 ka hatramin’ny 25 mey no ahafahan’ny mpifaninana sy ny mpanaradia azy manao fampielezan-kevitra. Ny 17 jona kosa no ho fantatra amin’ny fomba ofisialy ny lisitr’ireo voafidim-bahoaka ka handrafitra ny Antenimieram-pirenena vaovao.

Marigny A.