Politique

Partagé sur :
• facebook

Antomotra ny datin’ny 29 febroary, daty voatondron’ny Troika ary nifanarahan’ireo solontena Malagasy tany Pretoria fa hahavitan’ny lalàna momba ny famotsoran-keloka hisian’ny fitoniana eto.

 Daty ihany koa izay tokony hiverenan-dRavalomanana an-tanindrazana. Efa in-telo amin’izao manko izao no nanambara tamim-pomba ofisialy ny fiverenany an-tanindrazana Atoa Marc Ravalomanana saingy ny roa voalohany dia voasakana hatrany. Ny 19 febroary 2011, ohatra dia efa tao amin’ny seranam-piaramanidin’i Johannesbourg, Afrika Atsimo, izy no nilatsaka tampoka ny NOTAM mandrara ny fiaramanidina hitondra azy tsy hiantsona eny amin’ny seranan’Ivato. Tamin’ny 21 janoary 2012 lasa teo indray dia efa teny amin’ny habakabak’i Madagasikara ny fiaramanidin’ny Air Links nitondra azy no nihazakazahana nakatona avokoa ireo seranam-piaramanidina lehibe eto Madagasikara, tsy nahafahana nipetraka. Taorian’io dia nampanantsoin’ny Troika-SADC tany Pretoria ireo rehetra voakasika.

Tany no namantarana fa mila mody ny filoha Ravalomanana ary tokony ho vita mialoha ny 29 febroary 2012 izany. Raha ny zava-misy anefa dia toa tadiavina sakanana indray izay fahatongavan-dRavalomanana izay na dia nilaza ampahibemao aza Ratsirahonana Norbert Lala, mpanolotsaina manokan’i Andry Rajoleina, fa tsy hamoaka NOTAM mahakasika olona intsony. Mbola niverina anefa moa izany, saingy namboamboarina, tamin’ny 4 febroary 2012 fotoana tokony ho niverenan-dRtoa Ravalomanana an-tanindrazana. Ankehitriny indray dia misy karazana NOTAM hafahafa mivoaka eo anivon’ny tranonkalan’ny ASECNA amin’io datin’ny 29 febroary. Araka ny fanazavana dia hoe hisy mpilatsaka elon’aina amin’ny toerana manodidina an’Antananarivo ka hilatsaka amin’io andro io izy ireo. Dia samy velom-panontaniana ny rehetra raha toa ka fifanandrinfian-javatra sa fanakanana an-dRavalo tsy hody indray.

Nangonin’ i Soa

Tia Tanindrazana

Samia mijoro ho an'i Gasikara.