Politique

Hajo Andrianainarivelo Miandry izay hambaran�ny HCC

Politique
Alatsinainy 26 Desambra 2016

Tsy manana eritreritra hiara-hitantana amin'ny fitondrana ankehitriny ny antoko Malagasy Miara-Miainga raha ny nambaran'ny filoha nasionaliny, manoloana ny filazana fa fitadiavan-tseza no ataon'ny mpanohitra eto Madagasikara

. Nambaran’i Hajo Andrianainarivelo fa “tsy vonona hiara-hitantana amin'ny mpitondra ankehitriny izay tsy manaja lalàna” izy ireo. Takiany kosa ny fametrahana ny mpanohitra amin'ny toerana ametrahan'ny lalàmpanorenana azy. Taorian'ny fanambarana ofisialy nataon'ny antoko fa hijoro ho mpanohitra sy ireo dingana rehetra narahina araka ny lalàna, dia ny famoahan'ny Fitsarana avo momba ny lalàmpanorenana ny “Contrôle de constitutionalité” no andrasan'ny Malagasy Miara-Miainga. Ankoatra ny fanolorana soso-kevitra vaovao hitondra amin'ny fampandrosoana, ny haneho ireo tsy mety sy ireo tsy fanarahan-dalàna rehetra misy eto amin'ny firenena no anjara andraikitry ny mpanohitra. Eo ihany koa ny fanaraha-maso ny fampiasana sy ny famatsiam-bola azo. Tsy tokony ho sakantsakanana ny fijoroan'ny mpanohitra hoy ny antoko Malagasy Miara-Miainga hitarafana ireo maro an'isa eny anivon'ny Antenimieram-pirenena mba hisian’ny adihevitra demokratika marina sy ahafahan’ny olom-pirenena manana fijery vaovao amin’ny raharaham-pirenena. Anisan’ny singa iray ao anatin’ny firenena demokratika iray ihany koa ny fijoroan’ny antoko mpanohitra ara-dalàna.

Jean D.