Politique

Partagé sur :
• facebook

Miketrika mafy ny hidirana ao anaty fitondrana amin’ny alalan’ny fakana ny toeran’ny mpanohitra eny anivon’ny Antenimieram-pirenena i Hajo Andrianainarivelo, filoha nasionalin’ny antoko Malagasy Miara-miainga na ny MMM.

Tsy nampitovy hevitra aminy sy ireo mpiara-dalana aminy tao amin’ny antokony ny fanambarana tamim-pomba ofisialy nataon’i Hajo Andrianainarivelo fa mpanohitra ny fitondrana ny MMM, ka nahatonga ireo olom-boafidy sasany tao anatin’ny antokony nisafidy ny hamadika palitao, ary lasa niara-dalana amin’ny HVM. Tsy nahomby intsony ihany koa ny resaka fanonganana ny fitondrana Rajaonarimampianina tamin’ny alalan’ny hetsika Mitsangana ry Malagasy, ka any amin’ny fitadiavan-tseza indray izao ny laharam-pahamehana ho an’ity mpanao politika efa nirotsaka hofidiana filoham-pirenena ity. Sarotra ho azy ny hiverina amin’ny fanambarana politika efa nataony, kanefa henatra ihany koa ny hivadika vetivety, ka hiaraka amin’ny fitondrana hahafahana mahazo seza. Mandeha anefa ny resaka ankehitriny fa efa miketrika mafy ny hiara-dalana amin’ny HVM i Hajo Andrianainarivelo mba ho fanomanana ny fifidianana amin’ny 2018 fa sarin’ady no ataony sy ny mpitondra ankehitriny. Samy mikotrika ny hanakanana ireo kandida atahorana toa an’i Marc Ravalomanana sy Andry Rajoelina amin’ny alalan’ny “ni…ni…” izy ireo, ary tombanana hifanohana mandritra ny fifidianana. 

Toky R.

Tia Tanindrazana

Samia mijoro ho an'i Gasikara.