Politique

Hafahafa ny resaka “Iles Eparses” Niala an-daharana ny Pr Raymond Ranjeva

Politique
Alarobia 20 Novambra 2019

Tsy hita tao anatin’ny sary iombonana (photo de famille) taorian’ilay dinika nifanaovana teny Andafiavaratra momba ny raharaha Nosy Malagasy nobodoin’ny Frantsay ny Profesora Ranjeva Raymond,

anisan’ireo delegasionina Malagasy 5 nifampidinika tamin’ny solontena Frantsay ny alatsinainy lasa teo. Adiny roa teo ho eo nialoha ny fahataperan’ny dinika no efa niala tao ny tenany, raha ny angom-baovao natao. Inona no antony ? Tsy afa-po na nisy zavatra tsy nifanaraka tamin’ny eritreriny na fitaka natao taminy ve ? Sa kosa nesorina izy ? Henjana amin’ny diplomasia sy ny fifandraisana iraisam-pirenena izy, ka heverina fa tsy hanaotao foana. Matoa miseho izao dia ao raha. Nisy olon-kafa nasosoka tampoka ihany koa tao anatin’ny delegasionina Malagasy. Efa neken’ny firenena mikambana tamin’ny 1979 ny maha antsika an’io ka inona tokoa moa no mbola hatao any Frantsa ? Tsy ny fomba fampiharana izany ve no zava-dehibe mila dinihana ao anaty fifampiraharahana fa tsy handany andro amina zavatra hafa ? Manampahaizana, olon’ny lalàna ary efa mahafantatra tsara ny fomba fiasa eo anivon’ny fitsarana iraisam-pirenena ny Pr Raymond Ranjeva ka azo antoka fa misy antony goavana matoa nandao ny fifampidinihana izy. Ho hita eo ihany ny tohiny.

Toky R