Politique

Partagé sur :
• facebook

Mampitandrina ny amin’izay mety ho fihetsika hanakanana ny fodian-dRavalomanana an-tanindrazana ny fikambanan’ny Gasy Tia Tanindrazana na ny GTT Iraisam-pirenena.

 Nambaran’ity vondrona ity izay nanoratra taratasy ho an’ny fianakaviambe irasaim-pirenena fa tsy nahafa-po ary tsy nahitana vahaolana ho an’ny krizin’i Madagasikara ny fihaonan’ny Sadec tany Maputo farany teo. Na dia nanambara aza ny Sadc fa tokony hampiharina an-tsakany sy an-davany ny sori-dalana dia tsy mbola nisy fanasaziana ireo sakana ho amin’izany hatreto, hoy ny GTT Iraisam-pirenena. Neken’ny Sadc koa ny tetiandrom-pifidianana kanefa tsy nisy fepetra hentitra tanterahina hisiana fahatoniana mialoha ny fifidianana. Manoloana ireo rehetra ireo dia mitaky ny hametrahan’ny Sadc ny fepetra rehetra amin’ny fanatanterahana ny sori-dalana ny GTT Iraisam-pirenena.

Eo koa ny tokony hanasaziana ny mpanongam-panjakana, eny hatramin’ny sazy isam-batan’olona, ny fametrahana ny fitoniana ka ao anatin’izany ny famoahana ireo haino aman-jerin’ny mpanohitra, ny fahalalahana miteny sy maneho hevitra, ny fodian’ireo sesitany politika rehetra. Tokony handray andraikitra ihany koa ny Sadc amin’ny famerenana an-tanindrazana an’i Marc Ravalomanana, hoy ny GTT Iraisam-pirenena sy miantoka ny filatsahan-kofidiany. Ankoatra izay dia eo koa ny fikarakarana ny diniky ny samy Malagasy hotarihin’ny FFKM. Ny samy Malagasy no hifanaraka amin’izay tetiandrom-pifidianana. Mampitandrina ny fianakaviambe iraisam-pirenena moa ny GTT Iraisam-pirenena mba tsy hamoaka fanampiana ara-bola ho an’izay fifidianana tsy hifanarahan’ny rehetra, indrindra fa ny solontenan’ny Pnud eto amintsika izay mikasa hanome 15 tapitrisa dolara.

Nangonin’i Soa

Tia Tanindrazana

Samia mijoro ho an'i Gasikara.