Politique

Governemanta Minisitra 6 nesorina, 10 olom-baovao

Politique
Alakamisy 30 Janoary 2020

Tontosa omaly teny amin’ny Lapam-panjakana teny Iavoloha ny fanovana governemanta.

Nambaran’ny Filoha Rajoelina, fa nomena vahana ny fifandanjana isam-paritra sy ny miralenta, 40% na 8 ny minisitra vehivavy. Tanora latsaky ny 40 taona ny ankamaroany. 22 ny minisitera miampy minisitra lefitra iray sy sekreteram-panjakana iray. Naverina ary hapetraka ho minisitera iray ny minisiteran’ny rano, ny fanadiovana, ary ny fidiovana. Najoro ny minisitra lefitra miantsoroka ny fananganana tanàna vaovao. Noho izany dia miisa 24 ny governemanta hotarihin’ny Praiminisitra Ntsay Christian, ka miisa 10 ireo endrika vaovao, izay saika teknisianina sy manampahaizana ambony tanora vao erotrerony ny ankamaroany. Tsy tafaverina intsony kosa ny minisitry ny Filaminam-bahoaka teo aloha Atoa Rafanomezantsoa Roger, Fitsarana Atoa Jacques Randrianasolo, Fanabeazana Rtoa Volahaingo Marie thérèse, Fampianarana ambony Blanche Richard, Tontolo iainana Atoa Georget Alexandre ary ny Fahasalamana Pr Julio Rakotonirina.

Ireo tafaverina amin’ny toerany

Praiminisitra	Ntsay Christian
Fiarovam-pirenena	Rakotonirina Léon Richard
Atitany sy ny Fanapariaham-pahefàna	Razafimahefa Tianarivelo
Toekarena sy vola	Richard Randriamandrato
Fanajariana ny tany sy ny asa vaventy	Andrianainarivelo Hajo
Angovo sy ny Akoranafo	Ramarolahy Christian
Fitaterana sy ny Fizahantany ary ny Famantarana ny Toetr’andro	Randriamandranto Joël
Harena ankibon’ny tany	Ravokatra Fidiniavo
Mponina sy ny Fiahiana ara-tsôsialy	Naharimamy Irmah
Indostria sy ny varotra	Rakotomalala Lantosoa
Asam-panjakàna sy ny Lalàna Sôsialy	Ramampy Gisèle
Tanora sy ny fanatanjahan-tena	Tinoka Roberto Michael
Serasera sy ny Kolotsaina	Andriatongarivo Rakotondrazafy Lalatiana
Fambolena sy ny fiompiana	Ranarivelo Fanomezantsoa
Zandarimariam-pirenena	Ravalomanana Richard

Ireo mpikambana vaovao

Raharaham-bahiny	Dr Tehindrazanarivelo Jacoba Liva
Fitsarana	Jhonny Richard Andriamahefarivo
Filaminam-bahoaka	Randrianarison Fanomezantsoa Rodellys
Fanabeazam-pirenena	Andriamanana Josoa Sambatra
Fampianarana ambony	Assomacou Elia Béatrice
Tontolo iainana sy ny fampandrosoana	Raharinirina Baomiavotse Vahinala
Paositra sy ny fifandraisan-davitra	Ramaherijaona Andriamanohisoa
Rano sy fahadiovana ary ny fidiovana	Rakotovelomanantsoa Voahary
Fahasalamam-bahoaka	Ahmad Ahmad
Minisitra lefitra misahana ny tanàna vaovao sy ny toeram- ponenana	Zasy Angelo

Takiana ny vokatra haingana miantraika amin’ny vahoaka

Nanokatra varavarana sy nanao antso avo ho an’ny zanaky ny firenena na eto an-toerana na avy any ivelany manana finiavana hoenti-manompo ny firenena ny fitondram-panjakana, hoy i Andry Rajoelina omaly. Hita taratra na ny avy any avaratra atsimo, andrefana, antsinanana, afovoantany, eny fa na ny avy any ampitan-dranomasina aza, hoy ny filoham-pirenena. Maro no nanana andraikitra ambony tany ampita fa ankehitriny dia nantsoin’ny firenena. Ampy izay ary tsy izao intsony ny hoe mila mahafantatra olona na mandoa vola vao tonga minisitra, hoy izy. Mila haingam-piasa, mitondra vokatra mivantana, azo refesina, ary miantefa mivantana amin’ny fiainam-bahoaka, fahaiza-mitantana fahaiza-miasa, lavitry ny koliloly,... hoy ny filoha. Taratry ny fisokafana sy ny fahaiza-manaon’ny zanaka Malagasy io firafitry ny governemanta io. Miandry antsika ny Malagasy ary miandrandra fanovana hita amin’ny fiainany, hoy izy, izay nirary soa ireo mpikamban’ny governemanta.

Toky R