Politique

Partagé sur :
• facebook

Tsy olana mahakasika ny tany miteny ampahany na manontolo ny teny frantsay ihany ny vokatry ny asa fampihorohoroana fa tena loza mitatao ho an’ny firenen-drehetra,

  hoy ramatoa Michaelle  Jean, sekretera   jeneralin’ny  OIF (organisation internationale de la Francophonie) izay tonga mitsidika an’i Madagasikara ankehitriny. Mijery ny fizotry ny  fandraisana ny fivoriana izay  hatao eto amintsika amin’ny  volana novambra ho avy izao ny tenany  ka  nambarany  omaly fa  tena hojerena akaiky ny  momba ny fandriampahalemana sy ny fiarovana  ny ain’ireo  solontenam-panjakana avy amin’ireo firenena 80 mpandray anjara amin’ny fivoriana. «  Hiasa mafy ny  karazana  sampam-pitsikilovana sy  ny  mpaka vaovao rehetra  ahafantarana ny hatrany amin’ny antsipirihany indrindra. Mino koa aho  fa efa mandray ny andraikitra tandrify azy ny  mpitandro ny filaminana malagasy fa ny zava-dehibe dia hiara-misalahy  isika   ho amin’ny fahombiazan’ity fivoriana an-tampony ity »,  hoy ramatoa Michaelle Jean.

Eo  amin’ny  sehatry ny fampandrosoana dia  nambarany fa hiompana tanteraka amin’ny fampandrosoana sy ny fampivelarana ny maha olona  ny fampandriana fahalemana ny tany sy ny fikajiana ny tontolo iainana sy ny mahaolona ny lohahevitra hodinihin’ny  mpandray anjara  rehetra  ka tsy mampino ny hiheverana fa tsy hitondra ninoninona ho an’i Madagasikara ny fivoriana ankoatr’ireo fotodrafitrasa  hijoro. Manoloana  ireo  fandaniana vola be  amin’ny fandraisana  ity fivoriana ity mantsy dia tsy vitsy ihany ireo feo  miakatra  milaza fa tsy  laharam-pahamehana ny fandraisaina azy ity saingy  niezaka mandresy lahatra  ny Malagasy  kosa ramatoa sekretera jeneraly ny amin’ny maha zava-dehibe ny fandraisana azy. Omaly tolakandro ihany koa dia notokanana tamin’ny fomba ofisialy ny biraon’ny  frankofonia eny Ambohitsorohitra hiandraikitra ny aty amin’ny faritry ny ranomasimbe indianina ka nambaran-dramatoa Michaelle Jean fa hisy tetikasa  ho fampandrosoana ny vehivavy sy ny tanora ao amin’io birao io.

Andry Ratovo   

Tia Tanindrazana

Samia mijoro ho an'i Gasikara.