Politique

Fiverenan-dRavalo Raikitra sahady ny ramatahora tetsy Ivato

Politique
Talata 17 Janoary 2012

Tsy niandry ela akory dia nasiana fiofanana tampotampoka momba ny fiarovana ny seranam-piaramanidina.

Vondrona maromaro teo anivon’ny zandary no nanao fampisehoana teny an-toerana omaly ary niaka-midina tamin’ny fiaramanidina iray miaraka amin’ny basy. Entina hampisehoana hery sy sandry izany. Endrika iray hilazana fa vonona ny hiatrika ireo mpitandro ny filaminana Malagasy. Fa maninona anefa no tampotampoka teo ary koa mifandraika amin’ny filazan’ny filoha Ravalomanana fa ho fantatra ny alarobia izao ny fahatongavany ? Tsy mila hazavaina intsony ny mety ho fifandraisan’izany. Mainka koa nampian’ny lehiben’ny CIRGN fa efa vonona ny hitsena azy izy sy ny zandariny raha toa ka higadona tokoa eto an-drenivohitra ny filoha Ravalomanana. Izany dia mba ho fampiharana ny didy fampisamborana raha araka ny fanazavan’io lehiben’ny zandary eto an-drenivohitra io. Raikitra ny ramatahora etsy sy eroa kanefa tsy mbola nolazaina mazava ny fotoana hahatongavan’ny filoha Ravalomanana. Midika izany fa tena atahorana mafy io farany ary mahavita zavatra tampoka mihitsy ny mpitandro ny filaminana sasany mba hampisehoana ny talentany… Toy ny fiofanana tampotampoka izay nanafarana mpanao gazety maro mba hijery izany…
S.T