Politique

Fitsipaham-pitokisana ny governemanta Maty momoka indray

Politique
Alakamisy 09 Novambra 2017

Maty momoka na nitsefotra ilay hevitra hametraka fitsipaham-pitokisana ny governemanta saika hataon’ireo solombavambahoaka eny Tsimbazaza fa vitsy mpanaraka.

Nambaran’ny depiote Randrianasolo Jean Nicolas avy any Betroka nikononkonona azy ity omaly fa hatsahatra hatreo aloha ilay fanangonan-tsonia nataon’ireo depiote notarihany mba hampitoniana ny tontolo politika mavaivay eto amin’ny firenena ankehitriny. Heno koa anefa tetsy an-kilan’izay fa nisy ny fihaonana teo amin’ny praiministra Mahafaly Solonandrasana Olivier sy ireo niketriketrika ny « motion de censure » ity ka nahatonga ilay izy nitsefotra toy izao. Voalaza aza fa ny filohan’ny antoko HVM no sady filohan’ny antenimierandoholona Rivo Rakotovao, mihitsy no niditra an-tsehatra nampifanatona ny an-daniny sy ny an-kilany mba hampitsaharana ny disadisa miseho eo anatrehan’ireo olona mpomba ny fitondrana. Afaka mandry ivohon’ny vato indray aloha ny praiminisitra Solonandrasana Olivier raha hifanatrika mivantana miaraka amin’ireo minisitra tarihany amin’ireo solombavambahoka eny Tsimbazaza ny alakamisy 23 sy ny zoma 24 novambra ho avy izao. Fa mandra-piandry izay aloha dia azo antoka fa hangotraka ny eny Tsimbazaza eny anio mandritra ny fihainoan’ireo depiote amin’ireo tompon’andraikitra rehetra voakasiky ny tsy filaminam-bahoka.

NtsoavinaEvariste