Politique

Fitondrana HVM Manjaka ny tsy fifampitokisana

Politique
Sabotsy 03 Martsa 2018

Hita ho kaodikaody be ihany ny filoham-pirenena Hery Rajaonarimampianina amin’izao ankatoky ny fifidianana izao raha ny fihetsiny tato ho ato no jerena.

Maro ireo rafitra ara-panjakana niha nanakatom-baravarana mba tsy hahatafavoahan’ireo vaovao heverina fa mety hahatafaporitsaka ireo tsiambaratelo hanala baraka kokoa ny fitondrana toy ny tamin’ireo raharaha Houcine Arfa sy Claudine Razaimamonjy ireny. Tsiliam-baovao no nandrenesana maro amin’ireo mponina ao an-dapa no ahiana hamoaka ireo tsiambaratelo goavana na any amin’ny minisitera io na any amin’ny antenimiera. Tsy vao izao fa nahalasa saina ny mpanara-baovao, ohatra, ny zava-nitranga nahazo ny minisitra misahana ny tetikasan’ny filoham-pirenena teo aloha, Narson Rafidimanana, izay nanasonia fiaraha-miasa maro tamin’ireo kely maso saingy dia iny voatsoka iny ihany moa. Ny vaovao mafana rahateo matoa mivoaka dia vakiana fotsiny fa tsy avy any an-kafa akory no nipoirany fa tsy maintsy avy any an-doharano hatrany. Manomboka manjaka ny tsy fifampitokisana ao anaty fitondrana HVM, araka izany, ary raha ny heno dia nisy mihitsy ny minisitra iray izay nampanantsoina matetika tany an-dapa tany nanaovana fanadihadiana tsotsotra. Maro amin’ireo tandapa rahateo no efa miezaka manao fihetsiketsehana toa mitory sahady fa anisan’ny hifaninana ny ho tompon’Iavoloha atsy ho atsy.

J. Mirija