Politique

Fisandratana 2030 Tsy mazava amin’ny Malagasy

Politique
Alarobia 14 Febroary 2018

Maro ny Malagasy no tsy mahazo akory ny vontoatiny sy ny dikan’ilay vina Fisandratana 2030 nataon’ny filoha Hery Rajaonarimampianina tamin’ny 25 janoary 2018 lasa teo.

Nandany ora maro ny filoha nanazava io tombana io tamin’ireo nanatri-maso saingy tsy nipaka teny amin’ny sarambabem-bahoaka. Tao ny nanambara fa Antananarivo renivohitr’i Madagasikara aza tsy mba nanana vina nampandroso azy fa dia niaina tanaty fahantrana sy loto ary fahapotehana amin’ny lafiny maro koa aiza no hanantenana izany resabe izany ? Manaraka izany, ny 80%-n’ny Malagasy dia tantsaha ary miaina anaty tsy fahampiana, 45 % tsy mahay mamaky teny sy manoratra ka aiza no hahatakarany ireny teny maro nalahatry ny filoha ireny ? Ny zavatra nandrasan’ny vahoaka dia ny vahaolana haingana sy mazava mba hampihena ny fahasahiranany lavareny, saingy revo nitanisa ireo teny sarotra raisina sy takarina ny filoha. Ahoana tokoa moa no hahatakaran’ny vahoaka ireny teny teknika be nampiasaina tahaka ny hoe développement durable, ZES, PIB ireny. Tsy vitan’ny sarotra ny teny nampiasaina fa vitsy ihany koa no mba afaka nanaraka iny vina Fisandratana 2030 iny satria 15% ihany no manana fahafahana mampiasa jiro eto Madagasikara. Ny 11% ihany koa no mandoa hetra ara-dalàna, 5% no mba afaka mindram-bola amin’ireny banky lehibe ireny ary 90% dia miaina anaty sehatra tsy ara-dalàna avokoa. Araka izany, ny fanarenana ireny tarehimarika mampitotongana ny toekarena ireny no tokony ho nahamaika ny filoha ary tokony ho narahana fanazavana sy asa avy hatrany saingy variana nanao lesona be loatra (théorie) izy ka tsy fantany intsony fa maro no tsy mahatakatra ny tiany ambara. Tsy tafapaka tany amin’ny vahoaka sahirana, araka izany, iny vina iny ary izany no ilana mpitondra matotra, mahay mampianatra sy mitantana ny vahoaka fa tsy resena lahatra amin’ny kobaka am-bava sy teny sarotra takarina tahaka ireny.