Politique

Fifidianan’ny FIZAFATO Misy olana indray

Politique
Talata 01 Aogositra 2017

Nanao fanambarana teny Ambohipo omaly Andriamanarivo Berkeley, kandida iray mpifaninana amin’ny fifidianana izay ho filohan’ny fikambanan’ny zanaky ny Faritany Toliara hotanterahina kasaina hatao ny 06 Aogositra ho avy izao.

Nambarany tamin’izany fa rava ny komity mpanomana ny fifidianana noho izany tsy hisy io fifidianana io. Tsy mahaleo tena mantsy ity komity ity hoy hatrany izy satria tsy nanaja ny fanapahan-kevitra efa noraisiny. Efa fanapahan-kevitra noraisin’izy ireo hoy izy fa tsy natao handraisana ny antontan-taratasin’ny kandida ny datin’ny 27 Jolay lasa teo satria natokana ho andro fisaonam-pirenena. Mbola noraisin’izy ireo ihany anefa hoy izy ny antontan-taratasy filatsahan-kofidiana ana kandida iray izay lasa mpifaninana amiko. Io kandida io anefa hoy hatrany Andriamanarivo Berkeley dia mbola filohan’ny FIZAFATO am-perin’asa ary mbola tsy nametra-pialana tamim-pomba ôfisialy akory. Mangataka ny hanemorana ny datin’ny 06 Aogositra tokony hanatanterahana ny fifidianana araka izany ity kandida iray ity mandrapisian’ny fandaminana ny raharaha. Manainga am-panajana ireo Ray aman-dReny rehetra avy amin’ny zanaka am-pielezan’ny faritany Toliara ihany koa ny lehilahy mba hijery ifotony sy hanara-maso akaiky izao raharaha izao.