Politique

Partagé sur :
• facebook

Lany teo anivon’ny Filankevitra Ambonin’ny Tetezamita omaly talata 10 jolay 2012 maraina ny volavolan-dalàna fehizoro laharana faha 015/2012 tamin’ny 01 jona 2012 mikasika ny fifidianana Filohan’ny Repoblika fahefatra izay ahitana andininy miisa 39.

 Nisy ny fanovana nataon’ireo mpikambana nandritra ny asam-baomiera tao amin’ny andininy faha-5 andalana voalohany izay milaza fa ny mpilatsaka hofidiana ho Filohan’ny Repoblika dia tokony ho olona mipetraka amin’ny fari-panjakan’i Madagasikara, enim-bolana farafahakeliny alohan’ny daty farany fametrahana ny taratasy filatsahan-kofidina. Noho ny fiovana teo amin’ny fitantanana ny tetezamita sy ho fampiharana ny tondrozotra dia nodinihina indray mandeha teo anivon’ny Filankevitra Ambonin’ny Tetezamita io volavolan-dalàna fehizoro io. Niova hevitra anefa ny mpikambana tao, izay ireo mpomba an-dRajoelina avokoa no nivory sy nandany azy noho ny tsy fandraisan’anjaran’ny mpanohitra, ka nanisy fanovana ilay volavolan-dalàna fehizoro mikasika ny fifidianana filohan’ny Repoblika fahefatra izay efa lany teo aloha.

Araka ny voalaza ao amin’io fanovana izay natao io dia : tokony ho 60 andro mialoha ny andro fifidianana ny fametraham-pialan’ny Filoha am-perinasa, bileta tokana no ampiasaina, tokony hitovy zo ny kandidà rehetra amin’ny fampiasana ny haino aman-jerim-panjakana sy ny tsy miankina amin’ny fanjakana amin’ny fampielezan-kevitra, ny Fitsarana manokana misahana ny fifidianana no mamoaka ny valim-pifidianana farany ary manana fahefana handinika sy hitsara ny olana amin’ny fifidianana filoham-pirenena. Nitarika ny fivoriana ny filohan’ny Filankevitra Ambonin’ny Tetezamita, Jeneraly Rasolosoa Dolin ary notronin’ireo mpikambana ao amin’ny Birao maharitra.

Tia Tanindrazana

Samia mijoro ho an'i Gasikara.